Shillong, Lber 03 : U National President ka National People’s Party (NPP) Conrad K Sangma, un bamsmai kum u Myntri Rangbah ka Jylla ha ka sien ba-ar, ka ban long ha ka 7 tarik mynta u bnai.
Kat kum ka khubor ba la ïoh, u Myntri Rangbah Duh ka Ri u Narendra Modi bad u Myntri kam Pohïing ka Ri Amit Shah, kin wan lang sha Shillong ban pynshngaiñ ïa kane ka jingbamsmai, ka ban long ha Raj Bhavan, Shillong.
Ka BJP kala ai ïa ka shithi ai jingkyrshan ïa ka NPP ba kan thaw ïa ka Sorkar Thymmai ha Jylla. Kumjuh ruh u Kyrtong Shimet na Baghmara ula ai ka jingkyrshan.
Ki arngut ki MLA ka BJP bah Sanbor Shullai bad Bah AL Hek lem bad une u MLA shimet ki la ïashim bynta lang ha ka jingïalang jong ka NPP Parliamentary Party ba long hynne ka step Sngi Thohdieng.
Kumba long mynta, ka NPP ka la ïoh 32 ngut ki MLA, 26 ki jong la jong, 2 ngut ki MLA ka BJP, 2 ngut ki MLA ka HSPDP bad 2 ngut ki kyrtong shimet (Independent) .
Haba ïakren bad ki Nongthoh khubor, U Conrad ula pynpaw ïa ka jingsngewskhem ba ka sorkar ban thaw da ka NPP kan don 32-34 ngut ki MLA. Hynrei ula kyntait ban ïathuh ïa kiei ki MLA bad ki party aiu ki ban wan kyrshan ïa ka NPP.
Haba kylli ïa ka HSPDP bad PDF, u Conrad ula ong “Ngin ïoh 32 tam… Ngin ïai ap bad ïai peit”.
