Ba kyrshan 2 ki MLA HSPDP bad Ind la thikna ban ïalam ka NPP sa shisien ïa ka sorkar synrop

Shillong, Lber 03 : Ka kynhun ba ïalam da ka NPP ban thaw ïa ka sorkar thymmai ka la kiew kynsan na ka 29 ngut sha ka 32 ngut tang hadien khyndiat kynta ba ki la wan ban kynduh ïa u Lat ka Jylla, u Phagu Chauhan ha Raj Bhavan ban pyni ïa ka jingbun paid.
Katei ka kynhun kaba la jop haduh 26 ngut ki MLA ha ka step sngi Thohdieng ryngkat bad arngut ki MLA ka BJP bad uwei u MLA shimet ki la kynduh ïa u Lat uba la khot ïa ki kum ka kynhun kaba jop bun ngut eh ki MLA ha kane ka elekshon MLA kaba long ha ka jylla.
Ka jingkiew jong ka kynhun NPP sha ka 32 ngut kadei hadien ba arngut ki MLA ka HSPDP ba kynthup ïa u Bah Shakliar Warjri na Mawthadraishan bad u Bah Methodius Dkhar na Mawshynrut ki la leit ban kyrshan lang noh ïa katei ka kynhun ryngkat u MLA shimet na Rambrai.
Haba kren bad ki lad pathai khubor hadien ba la dep ban kynduh ïa u Lat, u Conrad K Sangma ba dei u nongïalam ka kynhun u la pyntip ba ka BJP ryngkat kiwei ki party ki la ai ka jingkyrshan na ka bynta ban thaw ïa ka sorkar. “Hooid, ngi la biang ka jingbun paid ban thaw ïa ka sorkar,” u la ong.
Nalorkata, utei u heh ka NPP u la ong ruh ba la pyntip ïa ki ba wat u Myntri Rangbahduh ka Ri u Narendra Modi bad ruh u Myntri ka tnad Kampohïing, u Amit Shah ba kin wan sakhi lang ïa ka jingpynbam smai ïa ka kynhun Myntri. “Kumta ngi dang ap shwa ïa ka jingpyntikna na ka ophis u Myntri Rangbahduh ba lun wan neem ha katei ka sngi bad kumta ngi hap ban ap shwa ïa ka tarik,” u la ong.
Haba jubab pat halor ka jingkylli la na ka liang ka NPP ka la leit neem ban tyrwa treilang bad ka TMC ne ka Congress, u Conrad u la ong, “Ngim pat kwah ban ong ei ei mynta hynrei ap bad peit shwa.”
Kumta da kane ka jingkynjoh ka jingbun paid sha ka 32 ngut ka National People’s Party (NPP) kala pynkhreh mynta ban wanphai biang ha ka bor bad ban ïalam ïa ka sorkar synrop kaba thymmai ban synshar hapoh ka Jylla .