Shillong, Naitung 22: Ka khubor ba la ïoh na ki pulit la ïathuh ba kawei ka longkmie kaba dei na ka Eastern West Khasi Hills ka la phah ïa ka jingujor ba ka la ïohpdiang ïa ka invitation na ka company ‘PSA Group’ ban pynïasoh bad ban pynlut pisa bad halor kane na ka liang jong ka la thep pisa kumba T. 18,000/-. Hynrei kham hadien ka la sngewthuh ba ka la shah thok.
Ha kawei pat ka jingjia u Mayadur Islam u la phah ka jingujor ba ha ka 11 tarik mynta u bnai, ha ka por kumba 4.30 baje mynstep, ki arngut ki co-worker ki la tuh ïa ka mobile phone bad ka pisa kumba T. 95,000/-, na ka jaka trei kam ka jong u kaba ha JN Stadium, Polo, Shillong.
Shuh shuh na ka liang jong ki pulit ki la ïathuh ba ha ka 20 tarik mynta u bnai u Bah Khrawpyrkhat Paliar u la phah ka jingujor ba ha ka 20 tarik jong u bnai Jymmang, 2024, ki runar bym lah ban ithuh ki la tuh ïa kiba bun ki tiar jong u tower kiba la shongdor kumba T. 1,20,801/- napoh ka shnong Rajaju (WKH).
