Shillong, Nailar 09: Ka khubor ba la ïoh na ki pulit la ïathuh ba kawei ka longkmie kaba na Shillong ka la phah ka jingujor ba ha ka 19 tarik u Risaw, 2016, ka la thied ka kali kaba don u nombar ML-05P-3863 na Highland Toyota lyngba ka finance na Shriram Commercial Vehicle Finance (SCVF) bad siew ka EMI kaba T. 27,339/- naduh 20 tarik u Risaw, 2016. Hynrei namarba ka khlem lah shuh ban bteng ban siew ïa ka EMI, ka la aiti noh ïa ka kali sha ka Shriram Commercial Vehicle Finance, hynrei kane ka company ka khlem pynphai pat ïa ki kot ki sla kumba la kular.
Kane ka longkmie shuh shuh ka la kynnoh ba katei ka company ka dang pyndonkam ïa katei ka kali ha ka kyrteng jong ka. Kham hadien u Balbir Kumar (guarantor) u la dawa ïa ki kot ki sla ba donkam kynthup ïa ka pension passbook, bank account, connected SIM card bad EPIC, halor ka nongrim ba u la mad ka jingduhnong ka pisa da kaba u long guarantor jong ka, ha kaba ka la mynjur.
Hynrei ha u bnai Naiwieng, 2023, ka la lap ba kumba T. 14,000/- manla ka bnai ka la shah sei napoh ka bank account jong ka bad kane ka pisa ka la kynnoh ba ka la rung hapoh ka kyrteng u Balbir Kumar kumba 9 bnai, khlem ka jingmynjur jong ka bad haba tohkit shaphang kane, uwei uba la tip kyrteng da u Niten, nongtrei ka Shriram Commercial Vehicle Finance u la phah ka money receipt kaba la kot T. 2.5 lak, kawei ka No Objection Certificate (NOC) bad kawei ka No Dues Certificate (NDC) kaba la soi bad shon muhor jong ka finance company lyngba ka WhatsApp. Hynrei katei kaba la ujor ka la suba ba katei ka money receipt ka dei kaba thok bad kumjuh ruh ka la suba ba u Balbir Kumar, ha ka jingïadei bad katto katne ki agent ka Shriram Commercial Vehicle Finance ki la ïalam bakla ïa ka.
