Shillong, Nailar 09: Ka Voice of the People Party (VPP) ha ka sngi Thohdieng ka la dawa ïa ka Meghalaya Public Service Commission (MPSC) ban pynbeit ïa ki jingbakla bad ban pynsangeh shuwa ïa ka personal interview jong ka Meghalaya Police service (MPS).
Ha ka shithi ba la phah sha u Chairman ka MPSC, U joint secretary ka VPP u Bah Shemborlang Rynjah u la ong, “Namar kata ka party ka dawa jur ba katei ka shnat treikam kadei ban pynbeit ïa ki jingbakla bad ban pynsangeh shuwa ïa ka personal interview kat bym pat lah ban pynbeit ïa kitei ki kam.”
Haba pynpaw ka jingsngewkhia halor ka jingjied ïa kiba ïakhun ïa ka personal interview jong ka kam MPS, u Bah Rynjah u la ong, “Ka party hadien ba la bishar bniah bad lyngba ka jingkhmih bniah ka la lap ba ki la don ki jingduna halor kane ka kam.”
U la ong ba katkum ka advertisement kaba 2 tarik u Nailar, 2019, ka rukom jied lyngba ka Para 8 clause V (c) ka la pynpaw ba ka cut-off ratio jong kiba ïakhun bad kiba shah khot na ka bynta ka personal interview kadei ban ïapher na ka 1:10 sha ka 1:2.5 kaba long ruh katkum ka jingpynbna ïa ka jingdon ki post.
“Wat ba ka minimum ratio jong ka 1:2.5 la don ka jingpyrkhat, ka jingdon kiba ïakhun ha ka personal interview kadei ban long kumba 42 lane 43 ngut kiba ïakhun na ka bynta ki 17 tylli ki post.
Hynrei ka jingdon kiba ïakhun ba la shah jied na ka bynta ka interview ki long tang 27 ngut bad kane ka la long ruh katkum ka result ba la pynbna da ka commission ha ka 25 tarik u Naitung, 2024, u la ong.
“Kane ka kam ba la leh da ka commission ban pynduna ïa ka jingdon kiba ïakhun kiba shah khot sha ka personal interview ka long kaba buh u dak jingkylli, naba kam shym la don ka official notification kaba la pynmih paidbah da ka commission ban pynduna ïa kiba ïakhun lyngba ka MPS advertisement,” u la ong da kaba bynrap ba halor kitei ki kam, kine ki jingleh da ka commission ka la pynmih ïa bun ki jingartatien bad kaba pynduh jingkyrmen ha kane ka rukom jied ïa kiba ïakhun ïa ka eksam.
