Nongpoh, Nailar 09: Ka Bethany Hospital Nongpoh ha ka sngi Thohdieng ka la pynkut noh ïa ka jingrakhe dap 10 snem ka jingïaid lynti naduh ba la seng ha u snem 2014 ban ai ka jingshakri sha ki bapang bashitom bad ïa kane ka jingrakhe la pynlong ha phyllaw jong ka Bethany Hospital ha Pahamsyiem, Nongpoh.
Ha kane ka jingpynkut noh ïa kane ka jingrakhe, ka don ruh ka khubor kaba pynkmen ïa kiba bun ki paidbah ka them Ri Bhoi bad ha ka jylla hi baroh kawei, namarba kane ka jaka ai jingsumar ka la pyniar ïa ka jingkam shakri paidbah da kaba plie noh ïa ka jingsumar khyllai ba la tip kum ka Dialysis Unit, ha kaba ki paidbah kim da donnkam shuh ban leit sha Shillong ne sha Guwahati.
Ha kane ka sngi ka Bethany Hospital ka la plie paidbah ruh ïa u durmot sah jingkynmaw jong u Dr. John L Sailo Ryntathiang (bam kwai ha dwar u Blei) uba dei ruh u nongseng bad u trai jong ka Bethany Outreach Hospital, Nongpoh bad ha kajuh ka sngi la pynlait paidba ïa ka kali kit nongpang jong ka Dorbar Shnong Pahamsyiem Nongpoh lyngba ka skhim CMFDS.
Kine ki jingtei ba thymmai naduh ka Dialysis Unit, u durmot sah kynmaw bad ïa ka thup sah jingkynmaw jong ka Bethany, la plie bad pynlait paidbah da ka Myntri ka tnad ka Koit ka Khiah ka Kong Ampareen Lyngdoh kaba la long kum ka kongsan ryngkat jingïadonlang jong u MLA ka Nongpoh Constitunecy u Bah Mayralborn Syiem kum u symbud kongsan, u Director jong ka Bethany Hospital u Achula D Sailo, Dy. Medical Superintendent ka Bethany Outreach Hospital, Nongpoh u Dr. C M Pohshna, ki doktor bad ki nurse jong kane ka hospital.
