Nongpoh, Rymphang,20: Ha kawei ka jingjia ba sngewngiew bad pynpar ñiangkhriat ïa kiba bun balang, uwei u heprit uba dang 10 snem ka rta na ka shnong Umtangar ha Ri-Bhoi u la shah pynïap dusmon ha ki runar bym lah satia ban ithuh ha kawei ka jaka ba long khlaw hajan kane ka shnong.
Katkum ka jingtip ba la iohlum, la ong ba kane ka la jia ha ka 18 tarik mynta u bnai bad la lap ruh ïa ka met jong u ha ka por 7:00 baje eiei janmiet ha kaba ki runar khlem jingisynei ki la dkhat jubor ïa ka jingim jong u heprit.
Ia u heprit ba la duh noh ïa la ka jingim la tip kyrteng kum u Kitborlang Marbañiang uba dang pule ruh ha ka Class-II ha kawei ka LP School ha ka shnong Umlur bad u dei ruh u khun basaw napdeng ki 7 ngut ki khun jong u Bah Synshar Nonghyndah bad ka Kong Diona Marbañiang
U Kpa jong une u heprit u la ïathuh ba u heprit Kitboklang u la mih na la iing ha ka sngi Saitjaiñ bad ki paralok hynrei um shym la wan phai iing shuh hynrei dei tad haduh ka sngi u Blei ba la lap ïa ka met jong u na kawei ka khlaw hajan ka shnong ryngkat ki dak mong ha ka durkhmat.
Ki Pulit ka Patharkhmah Police Station tang shu ioh jingtip ki la leit marmar sha ka jaka ba la lap ia ka met jong u heprit bad ban pynlong ia ka jingtohkit. Hadien kane, la rah noh ïa ka met jong u sha Civil Hospital Nongpoh ban pyndep ïa ka Post-mortem bad la aiti noh ïa ka met sha ki bahaiing hasem ha ka Lah Sngi U Blei na ka bynta ban pyndep ïa ka jinglehñiam ba khatduh.
Halor kane ka jingjia, ki kmie ki kpa ki la ujor da ka ejahar ha Patharkhmah Police Station bad ki Pulit ki sdang ia ka jingtohkit kaba bniah lap ksai ïa ki runar kiba donkti ha kane ka kam pyniap briew.
