Bah Hek phi ba ïajan bad u Modi te pan pisa na u ban shna Hospital ïa ki mrad : Ronnie

Shillong, Rymphang 20: Ha ka kynta jingkylli mynta ka sngi hapoh ïingdorbar, u MLA jong ka Mylliem u Bah Ronnie V. Lyngdo, u la ong ïa u Bah AL Hek, Myntri ka tnad Animal Husbandry and Veterinary ba un pan pisa na u Myntri Rangbah duh ka ri u Narendra Modi na ka bynta ban shna Hospital ban sumar ïa ki mrad khamtam ïa ki sniang bad ki masi.
Kane ka jingong u Bah Ronnie kadei ha ka por ba u ïashim bynta ha ka jingkylli ba la wanrah da u MLA ka Congress na Mawhati, u Bah Charles Marngar, uba la kylli la ka sorkar kan ai jingïarap ne em ïa ki nongri sniang, kiba la ïap noh ki sniang ba la sam da ka sorkar?. U Bah AL Hek, u la jubab ba kam don satia ka jingïarap, hynrei ha ka skhim la buh ka kyndon ba ka don ka insurance kaba saw hajar tyngka uwei u sniang.
Haba u Bah hek u la jubab shuh shuh ba haduh ym don ka Hospital ban sumar ïa ki mrad kiba pang ne ba shitom, u Bah Ronnie, u ba long ruh u nongïalam ka Liang Pyrshah, u la ïeng ban ong, “Bah Hek phi u nongïalam ba hakhmat ka BJP bad uba ïajan bad u Modi, balei phim pan pisa na u ban shna Hospital ïa ki mrad?”.
U Bah hek u la jubab ba ka na ka liang jong u, u sngew ïahap ïa kane ka jingong u MLA ka Mylliem.
Hadien pat la ïeng ïarap pynshai da u Myntri Rangbah, u Conrad Sangma, uba la ïathuh ba ka sorkar ka la thoh sha ka sorkar pdeng ban pan pisa 30 klur tyngka na ka bynta ban shna Hospital ïa ki mrad ha Upper Shillong lyngba ka skhim Prime Minister’s Development Initiative for North-East Region (PM-DevINE).