Shillong, Rymphang, 20: U Myntri Rangbah ka Jylla Conrad K Sangma ha ka sngi Baar u la ong ba ka Sorkar Meghalaya ka la kut jingmut ban pynbeit noh ïa ka jingïakajia pud bad ka Sorkar Assam.
Katkum ka jingong jong u, ka Sorkar Meghalaya ka la kyrpad ïa ka Sorkar Assam ba kan tuklar ban weng noh ïa ka ejahar ba la mudui pyrshah ïa ki saw ngut ki nongshong shnong ha kaba ïadei bad ka jingshah pynpra u mawnongrim katkum ka jingbthah jong ka Karbi Anglong Autonomous Council (KAAC) ha ka shnong Jatalong kaba hap hapoh Block-II.
Ka Sorkar ka la kular ruh ban leh da kaba tyngeh pyrshah ïa ka jingkhrong khajna be-aiñ hapoh u pud u sam jong ka jylla Meghalaya.
Haba jubab ïa ka jingkylli ba la wanrah da u MLA ka Congress na Mawhati u Bah Charles Marngar, u Sangma u la ong, “nga kwah ban ïaiban kumba la jia ha ki por ba la leit noh bad ngi la pyni ïa ka jingthmu jong ka Sorkar MDA-1 ha ki san snem baldep, ngi la kut jingmut ban ïaid beit shakhmat bad ban wanrah ïa ka jingpynkut bad ban weng noh shisyndon ïa ka jingïakajia pud. Na ka bynta kata, ngi donkam ïa ka jingïatreilang bad ban shimkhia ha ka rukom kaba dei.’
Halor ka jingjia ha ka shnong Jatalong, u Sangma u la ong ba ïa ka ejahar la mudui da u Ranger jong ka KAAC hynrei ym da ka Sorkar Assam.
“Ka don ka jingthmu ban kem (ïa ki saw ngut ki nongshong shnong). Hynrei, u Chief Secretary u la phah da ka jingthoh sha u Chief Secretary jong ka Sorkar Assam ban kyrpad ba ïa kane ka Case pyrshah ïa ki saw ngut ki nongshong shnong yn weng noh da kaba sdang ïa ka jingïakren………Dalade hi nga la kren ïa u Myntri Rangbah ka Assam bad dalade hi nga la kyrpad ïa u katba ki jingïakren ki dang tyllun shakhmat, katba ngi dang pyrshah ban jam shakhmat ban wad ïa ki lad ki lynti ïa kum kine ki jingjia kaba lah ban pynheh shuh shuh ïa ka jinglong jingman, katba lah ngin pyrshang ban ïakren sngewthuh bad u la mynjur ruh ba un sa peit ïa kane ka kam bad ngi la ïatreilang ryngkat bad nga kwah ban pyntip hangne ba ngi la ïohi borabor ïa ka jingshahskhor na ka Sorkar Assam bad khamtam eh u Myntri Rangbah,” u la ong haba pynpaw ïa ka jingkyrmen ba ïa kane ka kam yn sa lah ban pynkut noh kham kloi.
Ha kaba ïadei bad ka jingkhrong khajna be-aiñ, u Myntri Rangbah u la ong ba ki jingkhrong khajna kim jia satia hapoh u pud u sam jong ka Meghalaya namarba ka jylla ka la ñiew ïa u synsar kum u mar rep.
“Ha ka jingshisha, ïa kane ka rai, ka Sorkar MDA-I ka la ïarap shikatdei eh ïa ki nongrep bad ka jingkylli kaba mih halor ka jingkhrong khajna be-aiñ hapoh u pud synshar ka Meghalaya yn ym shah daleilei ruh em bad lada ka don kum kata, ngin hap ban leh eiei mardor,” u la ong.
U Sangma u la ong ruh ba kum kine ki jingjia, ki jia tang ha ki jaka ba dang hap hapoh u pud u sam jong ka KAAC.
“Lada ka don kum kata, ngin hap ban ïakren bad ka Sorkar Assam,” u la bynrap.
