Shillong, Naiwieng 04 : Katba nang mih ki sngi ka jylla Meghalaya kawei na ki jylla jong ka ri India kaba don ha ka thaiñ shatei lam mihngi ka la sdang ban paw ha ka kam ïalehkai phutbol na ka jingdon ki samla kiba tbit bad kiba trei shitom ban pynleit jingmut ïalade ha ka sap ba ki don la ka long ha kino kino ki jait jingïalehkai. Dang ha kine ki khyndiat sngi, u samla Amebalaker Wanniang u la shah jied ban leit pyntbit ha ka jingïalehkai siat khnam ha TATA Archery Academy kaba don ha Jharkhand.
Mynta ka jylla ka la sakhi sa ïa uwei u samla dang khie u samla Lamangkynsai Kharbuli u la shah jied ha ban pyntbit ha ka shlem ai jinghikai jong ka Hyderabad FC kaba dei ruh ka lahduh jong ka lympung ïalehkai Indian Super League (ISL) ban shah pyntbit shuh shuh ha ka kam ïalehkai phutbol.
Ïa u samla Lamangkynsai Kharbuli uba dei u rang ap kol uba ju shah hikai ha ka PFR Academy u la shah jied ha ka kynhun ki U-15 jong ka Hyderabad FC na ka jingpyrshang (trial) kaba dang shu dep pynlong shen ha kine ki khyndiat bnai ba la dep. U samla Lamangkynsai Kharbuli udei u rangap kol ba dang 14 snem ka rta bad udei u khun jong ka Kong Ïateilang Kharbuli ba shong ba sah ha Lawsohtun Block V bad mynta u dang pule ïa ka klas 9 ha Kelian Memorial School, Malki.
Halor katei ka jingshah jied u samla Lamangkynsai Kharbuli, na ka liang ka PFR Academy ha ka sngi Thohdieng ka la pynkup burom kyrpang ïa utei u samla ha Shillong Press Club. Ka Academy ka pynpaw ka jingsngewkmen bad sngew sarong ba u samla Lamangkynsai Kharbuli un ïoh ban don bynta lang bad katei ka klob ïalehkai radbah jong ka ISL bad ha kajuh ka por ka kitbok kitrwiang ba un ïoh ka met ba koit ba khiah bad ban nang kiew shaphrang ha katei ka kam ïalehkai.
