Shillong, Naiwieng 04 : Ka long ka jingsarong ïa ka jylla Meghalaya baroh kawei hadien ba ki heprit ïalehkai ïakura kiba la mihkhmat ïa ka jylla ki la khur takma na ka lympung ïakura kaba la tip kum ka 1st North East Sub Junior Boys & Grils Boxing Championship kaba la long ha Dirang, Arunachal Pradesh.
Ki takma ba ka jylla ka la ïoh ban khur na katei ka lympung ki kynthup kawei ka takma ksiar bad saw tylli ki takma rnong. U Sunny Thakuri u la ïoh ban khur ïa ka takma ksiar da kaba jop na ka jingïakhun jong ka kyrdan jingkhia ba 70kg. Katba kiba la khur ïa ka takma rnong ki kynthup ïa u Banrap Syiem Malngiang (40kg), ka Deiti Loina Sunn (38kg), ka Badhun Syiemïong (40kg) bad ka La–I–Matti Makri (52kg).
Na ka liang ka Meghalaya Boxing Association (MBA) ka pynpaw ka jingsngewsarong ai khublei halor katei ka jingïoh khur takma ki nongïalehkai ka jylla bad ai mynsiem ba kin nang trei shitom shuh shuh ha ki jingïalehkai jong ki.
