Shah jied u MP Rajya Sabha ka jylla kum u Special Invitee sha ka Parliamentary Committee ba bishar bniah ïa ka FCRA
Shillong, Nailur 16: U MP ka Rajya Sabha na Meghalaya u James P Kongkal Sangma ula shah jied ha u Lamphang jong ka Lok Sabha u Om Birla kum u nongshah khot sngewbha ban ïadonlang ha ka Joint Parliamentary Committee ka ban khmih bniah halor ka Foreign Contribution (Regulation) Amendment Bill, 2026.
Ka ophis jong ka Lok Sabha Secretariat ka la phah da ka jingthoh sha u James Sangma halor katei ka jingshah jied.
U Sangma, u dei u Nongïalam ka seng National People’s Party (NPP) uba mihkhmat ïa ka Jylla Meghalaya ha ka Rajya Sabha. Ka samoi treikam jongu ka la sdang ha ka 22 tarik u Jylliew 2026.
ïa ka Foreign Contribution (Regulation) Amendment Bill, 2026 la phah sha ka Joint Parliamentary Committee kaba kynthup ïa ki 21 ngut ki dkhot na ka Lok Sabha bad 10 ngut na ka Rajya Sabha ba kin khmih bniah bha ïa ka.
U MP ka BJP u Dr Sanjay Jaiswal ula shah thung kum u Chairperson jongka Joint Committee naduh ka 2 tarik u Nailur.
La bthah ïa ka Committee ba kan khmih bniah ïa ki jingtyrwa jong katei ka aiñ kaba la thaw bad ban aiti ïa ka kaiphod sha ka Lok Sabha ha ka Tarik kaba khatduh jong ka taiew kaba nyngkong jong ka Dorbar Tlang jong ka Parliament, 2026.
Ka Committee kan shong ïa ka jingïalang kaba nyngkong ka jongka ha ka 18 tarik u Nailur ha ka por 2.30 mynsngi ha Committee Room No. 2, EPHA, New Delhi. Ki nongmihkhmat na ka Ministry of Home Affairs kin ai jingbatai kaba bniah ïa ki dkhot halor ka Foreign Contribution (Regulation) Amendment Bill ha katei ka jingïalang.
Ka Foreign Contribution Regulation ka khmih ïa ki jingïoh pdiang bad ka jingpyntreikam ïa ki synñiang kiba la ïoh na bar ri da ki riewshimet kiba dei hok, ki seng bad ki kynhun ha ka ri India. Ka Ministry of Home Affairs ka dei ka bor khmih ïa ka FCRA.
Ka Parliamentary Committee kan bishar bniah ïa kitei ki jingtyrwa hashwa ban aiti ïa ka kaiphod sha ka ïing Dorbar. Ka jingkynthup lang ïa u Sangma kum u nongshah khot sngewbha ka ailad ïa u MP ka Meghalaya ban ïoh ïatai bha halor katei ka Bill.