Kan dei ka Ïew kaba hehtam napdeng ki project shna ïew hapoh ka Jylla: Conrad

Shillong, Nailur 16: U Myntri Rangbah ka Jylla Conrad K Sangma ha ka sngi Balang ula buh ïa u mawnongrim ban shna pynbha ïa ka Iew Malki ha Madan Malki, Shillong, ba T.24.27 klur, ha ka jingiadonlang ka MLA Dr M Ampareen Lyngdoh.
Kane ka project ka dei shibynta na ka jingshimkhia ka Sorkar ban pynheh ïa ki Iew ha kylleng ka Shillong, da ki project ba shongdor T.130 klur bala shim lyngba ka mang tyngka ka Jylla.Nalor kane, ki project ba shongdor T.100 klur la pyntreikam ha kylleng ki jaka ka Shillong hapoh ka Smart City.
Ki project ba bei tyngka ka Jylla ki kynthup ïa ka Laitumkhrah Shoping Complex ba T.38 klur, ka Iew Laban ba T.14 klur, ka Iew Lumshyiap ba T.2 klur, ka jingpynroi ha Polo ba T.30 klur, ka Iew ki nongshong dukan madan ha Dhankheti, Barik, Brightwell Bungalow, MUDA bad Polo ba T. 6 klur, Khasi Market ba T.1 klur, ka jingshna pynbha ia ka Iewduh ba T.14 klur bad ka Iew Malki ba T.24.27 klur.
U Conrad ula ong ba ka jingkynshew ha ki jingtei jong ki Iew ka dei kaba thmu ban pynkhlain ïa ki kam kamai kajih, pynioh ïa ki jaka khaïi kiba kham biang bad plie ïa ka lad kamai jakpoh.
Ula ong ba ka jaka na ka bynta ka Iew Malki ka dei kawei na kiba heh tam napdeng ki project shna Iew hapoh ka Jylla, kaba pyni ïa ka jinglah jong ka thain ban long kum ka jaka khaii kaba kongsan ka ban ai jingmyntoi ïa ka Malki bad ki shnong ba marjan.
U Myntri Rangbah ula kren ruh halor ki project jingtei kiba heh, kiba thmu na ka bynta ka thain.Ki kam kila sdang ban pynlong ia ka Barik Point kum ka Urban Hub ba kongsan, katba ka Sorkar ka dang pynkhreh ban shna ïa ka surok 4-lane na Rilbong Museum sha Anjalee Point, Rhino Point bad Civil Hospital ban pynduna ia ka jingkhapngiah ka iaid ka ieng ki kali.
U ïathuh ba kumba 75% na ki jingtei ïa ka New Secretariat ha Umsawli kala dep bad ka Sorkar ka khmih lynti ban sa kynriah noh sha katei ka jaka ha u snem ban wan.Hadien kane ka jingpynkynriah, ïa ka jaka ba don ka Secretariat ba mynta la tyrwa ban pynroi da ki surok ba kham heh, ka jaka ïaid kjat paidbah bad ki jaka ba jyrngam da ki jingthung.
U Conrad u ong ba kine ki project ki lah ban wanrah ïa ka jingkylla kaba khraw ïa ka Malki bad ki shnong ba marjan ha kine ki arsnem haduh laisnem ban wan.
Haba kren halor ki sienjam bala shim da ka Sorkar ban wanrah ïa ka roi ka par ha kine ki phra snem bala leit noh, u Myntri Rangbah ula ong ba ka jingkiew ka dei ban ai jingmyntoi beit beit ïa ki briew shimet, ki longïing longsem bad ki shnong ki thaw.
Ula ban jur ba ka roi ka par ka dei ban kynthup lang ïa baroh bad ban pyntrei ïa ki ha ryngkat bad ki shnong ki thaw, ki bor treikam nala tynrai bad ki nongialam shnong.Ula ban jur ruh ïa ka jingdonkam ban pynbiang tarajur hapdeng ka jingkiew ka ioh ka kot bad ka jingiada ïa ka mariang, haba pynpaw ba ka sawdong sawkun ha ka mariang bad ka ioh ka kot ka dei ban ïaid ryngkat ryngkat.
U Myntri Rangbah ula bthah ïa ka Tnad Urban Affairs bad ïa ki Contractor ba kin pynthikna ba kin trei bha ïa ka kam bad ban pyndep hapoh ka por bala buh ïa ka project ha Malki.Ula kyntu ïa ki Rangbah Shnong bad ki nongialam ka thain ba kin peitthuh ïa ka kam.