Shillong, Nailur 16 : Ki riew runar ki la kawang artylli ki petrol bom ïa ka ophis Directorate of Mineral Resources (DMR) kaba don ha Risa Colony ha kaba kawei ka kali ka la julor.
La ïathuh ba uwei u petrol bomb u la hap ha phyllaw jong ka ophis bad dei lang ïa ka kali Alto kaba don ïa u number ML 05 AC 0429, kaba dei jong uwei u ophisar.
Kane ka jingjia ka la jia ha ka por kumba 3:15 baje nohphai sngi katba ki nongtrei ki dang don ha la ki kamra ophis treikam.
Na ka liang ki pulit na Laitumkhrah Police Station ki la hiar sha katei ka jaka bad ki la pynlong ruh ïa ka jingtohkit kaba bniah.
U Myntri Rangbah u Conrad K Sangma ha ka sngi Balang ula leit hiar jurip kyrkieh sha ka Ophis ka Directorate of Mineral Resources (DMR) ha Risa Colony hadien ka jingshah kawang petrol bom ha ki runar, kaba la wanrah ïa ka jngjulor jong kawei ka kali ba pynïeng ha phyllaw.
U Myntri Rangbah, uba la synran da u Chief Secretary bad ki heh Ophisar, ula peit thuh ïa ka jinglong jingman bad kular ban ai bai lutksan ïa ka kali ba shah pynjulor.
“U Myntri Rangbah ula peit thuh ïa ka jinglong jingman. Ula ong ba naba ka kali ka dei jong u nongtrei bad ka dei ka kali shimet, ka Sorkar kan ïarap bad ka bailut baisep. U CM ula ban jur ruh ïa ka jingdonkam ban pyndait kham bun ki kor CCTV, ym tang hangne hynrei ïa kiwei ki Ophis ruh khnang ba yn lah ban ïoh ring dur ïa kum kine ki jingjia” ong u Director ka DMR Bah MB Tongper.
Haba ïathuh ïa kaei kaba jia, u Bah Tongper ula ong “Nga dang don ha kamra, Nga dang shong jingïalang bad nga la ïoh sngew ïa ka jingpait iit. Nga dang mut ba ka kali ka la tynrah ïa u paia, hynrei ynda ngi la ïakhmih bha, ngi la ïohi pynban ïa ka ding. Ka kali kala kem ding na ki bynta ba shakhmat”.
“Donbok ba u nongtrei jong ngi u don shabar bad tang hapoh 4-5 minit, ngi la lah ban pynlip ïa ka ding” ula ong.
Ki Pulit ka Laitumkhrah Police Station ki la sdang ïa ka jingtohkit hadien ba ujor ïa 2 tylli ki ejahar-kawei da u Director ka DMR bad kawei da u Nongtrei uba dei u trai jong kane ka kali.
“Ngim tip satia mano ba leh ïa kane. Kane ka dei ka sien nyngkong ba kum kane ka jingjia kala jia bad ngim tip satia ïa ka daw. Ngi la dep pyntip lut sha ki Pulit bad ka jingtohkit ka la ïaid mynta” ong u Bah Tongper.
