Shah jied u GS ka Meghalaya Athletics Association kum u Jt Secretary ka Athletics Federation of India

Shillong, K’Lyngkot 06 : U General Secretary ka Meghalaya Athletics Association, Bah Finely Pariat u la shah jied ban shimti kum u Joint Secretary jong ka Athletics Federation of India ha ka elekshon jied nongkitkam jong ka Federation jong ka Ri kaba long ha Chandigarh.
Kane kadei ka sien kaba nyngkong eh ba ki nongïalam ba peit ïa ka Athletics ne ki jingïalehkai sports ha ka jylla ba kin ïoh ban bat syndon haduh ka kyrdan Joint Secretary ha kano kano ka Synjuk ïalehkai jong ka ri India.
U Bah Finely u la ïathuh ruh ba ïa kane ka elekshon jied nongkitkam jong ka Federation la wan ban pynïaid da u Retd Chief Justice jong ka Punjab High Court.
“Nga ainguh nyngkong ïa U Blei uba la plie lad ïanga ban long kum uwei na ki dkhot jong ka Federation namar kadei ka kam kaba ngam ju phohsniew mynno mynno ruh ba ngan kiew sha kane ka kyrdan. Nga ai khublei ïa i kurim, i Kong Balari Lyngskor kumjuh ki khun, i Wanda bad Rolf kiba ju ai mynsiem bad kyrshan ïanga ha ki por baroh. Nga ai khublei ïaphi baroh ki paralok, kiba haiing hasem ki kyrshan ïanga,” u la ong.
Da kaba ai khublei lang ïa ki lad pathai khubor kiba ju ïa trei lang na bynta ban kyntiew ïa ki kam ïalehkai ha ka jylla, u Bah Finely u la ong ruh ba u sngew kmen ban long uba nyngkong eh na ka Jylla Meghalaya ban shah jied kum u dkhot ha kane ka synjuk ïalehkai kaba heh tam ha ka Ri.
Ka Athletics Federation of India kadei ka Federation kaba la ïoh teng ruh ïa ka nam kum kawei na ki synjuk ïalehkai kaba kynsai tam ha ka dewbah Asïa ïa kaba la jied bad ithuh da ka FICCI bad Times of India bad nalor kiwei ki agency.
Ym tang katta ka la shah jied ruh kum kawei na ki 6 tylli ki Federation kiba pawnam tam ha ka pyrthei ha ka jinglah jong ka ban treikam bha.