Shah jied u Bah SF Lyngdoh bad Rayonald Kharkamni kum u Chairman bad Secretary ka Nongpoh Town Committee

Nongpoh, Risaw 09: Ka Nongpoh Town Committee kaba dei ruh kawei na ki kynhun kaba ai iaka jingshakri ban peit bad khmih na bynta ban wanrah ïaka roi ka par jong ki 11 tylli ki shnong kiba hap hapoh ka Nongpoh town, ka la ioh ban pyn thymmai ïaki nongïalam bad ki nongkitkam ba pura u Chairmam, Secretary bad ki dkhot ki ba pura hadien ba la kut ka samoi treikam jong ki nongïalam barim.
Ha katei ka jingjied ïaki nongkitkam jong ka Nongpoh Town Committee, ïaka kam Chairman la ioh da u Bah Successful Lyngdoh u ba dei ruh u Rangbah Shnong ka Saiden, bad ïaka kam Secretary la bynshet biang ha u Bah Rayonald Kharkamni bad kiwei kiwei ki kynthup ïa u Bah CB Syiem kum u Adviser, Bah Rexon Warjri bad Celestine Syngkli kum ki Vice Chairman, Bah Assistant Secretary ha u Bah Vicky Syngkli bad u Samla Anthony Suchiang ryngkat bad kiwei kiwei ki dkhot.
Ha katei ka sngi ban jied bad pynthymmai biang ïaki nongkitkam ka Nongpoh Town Committee la wan ban ïadon bynta da u Bah Rangkynsai Makdoh CEM bad Chairman barim ka KHADC u ba la shim ruh ïaka bynta kum u Chairman ka Election Committee Nongpoh Town, u Bah T Nongkhlaw Secretary ka Election Committee, Bah C B Syiem Chairman barim ka Nongpoh Town Committee, u Bah H Namsaw myntri ka Hima Khadar Lyngdoh ha ryngkat bad ki Rangbah shnong bad ki secretary shnong bapher bapher jong kitei ki 11 tylli ki shnong.
Haba kren ha katei ka sngi na ka liang u Bah C B Syiem kum u Chaiman barim ka Nongpoh Town Committee, u la ong ban long u nongïalam jong ka Nongpoh Town committee kam dei ka nongkynti jongno jongno, hynrei ka dei ka kamram jong baroh ki riew rangbah kiba don ïaka jingbah khlieh ban wan rah ïaka roi ka par ha baroh ki shnong, ha ka juh kapor u kitbok kit wriang ruh ïaki nongïalam kiba thymmai ba kin dang iai trei shitrhem ha ka kam ba la bynshet haki bad u kyntu ruh ba kin ai ka jingtrei kaba khuid kaba suba khlem ka jingnoh shylliang shano shano.
Naka liang ki nongïalam ka NTC kila ong ruh ba haka jingïalang ban wan kin sa kynthup lang ruh ïa ki nongïalam Hima, Dorbar Raid bad ki shnong ba dang sah.