Shah jied u Bah John F Kharshiing kum u General Secretary ka North East Olympic Assocociation

Shillong, Risaw 02 : U Bah John F Kharshiing uba dei u Working Presdient jong ka Meghalaya State Olympic Association (MSOA) u la shah jied kum u Secretary Genral ba thymmai jong ka North East Olym[ic Association ha ka jingïalang kaba la long ha ka sngi Thohdieng.
Ki nongkitkam jong ka North East Olympic Association ba kynthup ki President bad General Secretary jong ki phra tylli ki jylla, ka Meghalaya, Assam, Arunachal, Manipur, Mizoram, Naga-land, Sikkim bad Tripura ha ka 30 tarik Nailur 2022 ha ka por 6 baje janmiet ki la pynlong ka jingïalang ha ITC Hotel, Ahmedabad, Gujarat.
Ka jingïaktynduh lang jong kitei ki nongkitkam ba hakhmat jong kitei ki phra tylli ki jylla kadei ruh hapdeng ka jingpynlong ïa ka XXXVI National Games 2022 ban ïatai ïathir ha kaba ïadei ban pynïaid beit pynïaid ryntih ïa ka wat pynlong kaba ar jong ka lympung North East Olympic Games. Ïa ka jingïalang la pynïaid da u Th. Radheshyam uba dei u President ka Manipur Olympic Association.
Ha katei ka jingïalang na ka jylla Meghalaya la mihkhmat da u Bah John F Kharshiing uba dei u Working President jong ka Meghalaya State Olympic Association (MSOA) ha ryngkat u Bah Finely L Pariat uba dei u General Secretary ha kaba kitei ki arngut ki la buh shibun ki jingai jingmut na bynta ka jingpynkhreh jong ka jylla ban pynlong ïa ka North East Olympic Games hapoh la ka jong ka jylla.
Ha katei ka jingïalang ki nongkitkam ka Nagaland ki la pynpaw ba ki kwah ban ïoh pynlong ïa ka 3rd North East Olympic Games 2024 ha kaba la pdiang ïa katei ka jingtyrwa jong ki bad ba yn sa ïakren pat ha kawei ka jingïalang. Ka la don ruh ka jingai jingmut ba ha ka wat pynlong kaba bud yn shah tang na bynta ki jait jingïalehkai ba ïashim bynta ha ka Olympic.
Ha katei ka jingïalang la rai ruh ban ïakren bad baroh ki Myntri Rangbah, ki myntri sport, dkhot jong ka Parliament kiba dei na ki jylla ka thaiñ shattei lam mihngi ka ri ban pan ka jingkyrshan ha kaba ïadei bad ka jingkyntiew ïa ki kam ïalehkai hapoh jong ka dong ka thaiñ.
La jied thymmai ruh ha katei ka sngi ïa ki dkhot jong ka Executive Body ka NEOA ha kaba u Th. Radheshyam, (Manipur) u la shah jied kum u President ba thymmai na bynta ar samoi, Abu Mehta, (Nagaland), Working President, Bah John F Kharshiing, (Meghalaya) Secretary General, Mazawma Vanchong, (Mizoram) Trea-surer, Abraham K Techi, (Arunachal), Kuber Bhandari (Sikkim), Lakhya Konwar (Assam) bad u Rupak Debroy (Tripura) ki la shah jied kum ki Vice President bad General Secretary.
Na ka liang u President ba thymmai u la ai khublei ïa baroh ki dkhot kiba la ïasnohktilang bad kiba la ai shibun ki jingai jingmut bad pynpaw ruh ba nangne shakhmat ka synjuk kan nang lah ban leh shibun ki kam ban ai mynsiem ïa ki samla ïalehkai kiba don ka sap jong ka dong ka thaiñ shatei lam mihngi ka ri India.