Shillong, ïaïong 17: Ka sngi ba lai jong ka lympung 5th Meghalaya State League ka la sakhi ïa lai tylli ki kynhun kiba la khur ïa ka jingjop da kaba suk ha la ki jong ki jingïalehkai.
Ka Mawlarshong SC ka la jop suk da 5-1 pyrshah ïa ka Seng Samla Umdang Pyllun ha ka Group H kaba la long ha Mawkyrwat, katba ka Williamnagar Janepih Youth SCA ka la pynliem noh ïa ka Attong Matgrik FC da 3-0 ha ka Group G. Nangta ha Mairang, kaba la wanphai biang kum ka jaka ban pynlong ïa ka MSL hadien 9 snem, ka la sakhi ïa ka jingwan tuid u paidbah kiba la sakhi ïa ka Langsning FC kaba la pynjemkhnap ïa ka Mishon SSCC da 4-1 kol ha ka jingïalehkai ba nyngkong jong ka Group F.
Haba bishar ïa ka jingïakhun hapdeng ka Mawlarshong SC pyrshah ïa ka Seng Samla Umdang Pyllun, kiei kiei ki la sdang bha na ka bynta ka Umdang Pyllun ha kaba ka la ïoh ban lam khmat ha ka minit kaba 30 lyngba u Rangkynsaistar Mawsor. Hynrei kam shym la lah satia ban ïada ïa ka kol bad ka Mawlarshong ka la lamkhmat kylla da 2-1 kol shuwa ban jam sha ka por shongthait lyngba ki kol na u Hopefullness Wanniang (36’) bad u Arkwis Wanniang (43’). U Wiwonstar Nongsiej (74’, 85’) bad u Lenny Kravitz Lyngdoh (83’) ki la pynthikna ïa ka jingjop khlem jingartatien ha ka kylla miet da kaba thep sa lai kol na ka bynta ka Mawlarshong.
Ha kajuh ka por ka Langsning ruh ka la hap ban wanphai na ka shi kol ban khur ïa ka jingjop. Tang kumba katto katne por ba la sdang ka jingïalehkai, u Rikyrshan Warjri (3′) u la thep ïa ka kol kaba stet tam jong kane ka lympung na ka bynta ka Mishon shuwa ba u Nelson Rymbai (5′, 8′) un pynkhihjar ar sien ban buh hakhmat ïa ka Langsning. U Kyrmenskhem Mukhim (45′) u la bynrap sa kawei shuwa ka por shongthait bad u Manbhalang Nongmin (77′) u la thep ïa ka kol kaba saw ïa ka Langsning ha ka kylla miet.
Ha kawei pat ka liang ka Attong Matgrik FC, kaba khlem jop satia ïa kino kino ki jingïalehkai jong ka ha ka MSL 2024, ka la bteng ïa ka jingïakhun kaba khlem jop da kaba shah liem noh da 3-0 kol ha ka Janepih Janepih Youth SCA ha Williamnagar lyngba ki kol ba la thep da u Rishembhalang Wanniang (38′), u Banteilang Synnia (49′) bad u Edyson Iawphniaw (65′).
Ki la don ruh ar tylli ki jingïakhun ba kut ha ka jingïakhaid hynne ka sngi, ha kaba ka Laskein SCSC bad ka Lamin XI SCC ki la thep mar 2-2 ha ka Group C ha Amlarem. Baroh ar kynhun ki la ïoh ban lamkhmat markylliang ha kane ka jingïalehkai, ha kaba ka Laskein ka la pynkhihjar lyngba u Rithrangmiki Biam (14′) bad u Iomaikyjohn Lamare (77′) katba ka Lamin XI ka la thep lyngba u Jowel Khongdup (24′) bad u Genial Lamin (44′).
Ha kawei pat ka jaka, ha Wahiajer, ka Group E ka la sakhi ïa ka Iatyllilang Lumsehkot CSC bad ka Lamyrsiang SCC kiba la ïakhaid mar 1-1. Hadien ka jingïalehkai kaba khlem kol ha ka kylla step, u Soniroy Suchiang (58′) u la pynlamkhmat ïa ka Iatyllilang Lumsehkot shuwa ba u Eborki Marsharing (81′) un pynïakhaid na ka bynta ka Lamyrsiang.
Kumjuh ruh ka jingïalehkai jong ka Group B ha MFA Turf ha Shillong ka la jan poi sha ka jingïakhaid tad haduh ba ka penalty ha ki minit pynjlan ba khatduh, ba la thep da u Iakmenlang Khongjee (90’+4), ka la plie lad ïa ka Mawphu SC ban pynliem ïa ka Mawlum Tyrsad SCC da 1-0 kol.
Ka Rymbai Shkenshynriah SC ruh ka la jop da 1-0 hynne ka sngi pyrshah ïa ka Jalaphet Moochut Pyrdung SC ha ka Group D ha Khliehriat. Katei ka namtam la thep da u Monush Lapang ha ka minit kaba 74.
Ha kane ka sngi Saitjaiñ (18 tarik ïaïong, 2026) kin don tang ar tylli ki jingïalehkai, ha kaba ka Umlakro SC kan ïakhun pyrshah ïa ka Lawbah SC ha ka Group F ban long ha Mairang nangta ka Maram FC kan ïakhun pyrshah ïa ka Balmanduri FC ha ka Group G ban long ha Williamnagar. Baroh ar tylli ki jingïalehkai kin sdang ha ka por 3 baje nohphai sngi.
