Trei shitom ki ASHA kum ki shipai, hynrei dang shah leh meinah ha ka Sorkar: Chairman KHADC

Shillong, Ïaïong 17: Ka Meghalaya Asha Workers Union (MAWU) ha ka sngi Thohdieng ka la pynlong ïa ka jingïakynduhlang kaba 6 ha Madan Student Jaïaw bad ha kane ka jingïalang la pynthymmai ïa ki nongkitkam jong ka bad kane ka jingjied nongkitkam ka ju long ha ka 1 sien ha ka 3 snem.
Ha kane ka jingïakynduhlang (6th Conference) la wan ban long nongshah khot sngewbha da u Chairman ka KHADC u Bah Strong Piller Jana, nangta u EM KHADC u Bah Isynei Hinge u MDC ka Umroi, nangta u Chairman ka Sur u paidbah u Bah Kyrmenlang Uriah bad kiwei kiwei.
U Chairman ka KHADC haba kren u la ong ba ki ASHA ki dei ki shipai kiba khlaiñ naba dei maki kiba hakhmat duh ban poi shaduh ki kyndong kynshrot ban lait ai ki jingsumar.
U la ong ruh ba kidei kiba hakhmat duh ban ïa ki doktor ne ki nurse bad ki long ruh ki shakri kiba khraw tam ban pynduna ïa ka jingïap ki kmie ba armet bad ki khyllung ha kane ka jylla.
U la pynkynmaw ba ha ka por bym pat thaw ïa ki ASHA ka Jylla Meghalaya ka kiew bha ki longkmie ba armet kiba ïap hynrei naduh ba la thaw ïa ki ASHA ha u snem 2005 lyngba ka National Health Mission ka la ïarap shibun ha kaba 20% eiei la hiar ka jingïap ki kmie ba armet bad ki khyllung.
Kumta ula pynpaw ba donkam ban pynkup bor ban ai ki atiar, nangta ki jingai jinghikai pyntbit ïa ki, nalor ka jingsiew kaba ïahab katkum ka jingdonkam ka por.
U la ong ba kim dei ban duh jingkyrmen wat hapdeng kiba bun ki jingeh hynrei ban ïai ap ba kan poi ka por ba ka Sngi kan sa tynshaiñ wat lada ka Sorkar ka leh meinah leh bym suitñiew ïa ki jingeh jong ki kum ki shakri jong ki paidbah.
“Long kiba ïaishah bad kiba ap khmih lynti naba kan sa poi ka por ba ki jingeh jong phi kin sa urlong bad kan sa poi ruh ka por ba ka sngi kan sa tynshaiñ ha kano kano ma ka por bad U Blei un sa pyni ïa ka lynti kaba dei,” bynrap u Chairman ka KHADC.
La ïoh ki jingkren na u Bah Isynei Hinge MDC bad EM ka KHADC ha kaba u la kular ba kum u nongmihkhmat un ïai don ryngkatlang bad ki ha ka por ba ki donkam.
Ha kane ka jingïakynduhlang la ïoh ruh ka jingkren na u Bah Kyrmenlang Uriah uba dei u Chairman ka Sur u Paidbah, nangta na u Legal Adviser bad kiwei kiwei. La don ruh ki jingshad, jingrwai, nangta la pynbna ruh ïa ki kyrteng nongkitkam ba thymmai ba kynthup ïa ka Kong Mira June Marsing ba shah jied kum ka President da ka jingïoh haduh 1578 vote, nangta Kong Wanshailut Wahlang 1121 vote bad Treasurer Kong Fiona Tmung 1183 vote.
Ha kane ka jingïakynduhlang la don ki jingshad, ki jingrwai bad ka jingpynskhem ïa ki nongkitkam ba thymmai bad kumjuh ruh bad kiwei kiwei pat ki prokram.