Shah jied u Bah Finely L Pariat kum u Manager sha ka Asian U20 Athletics Championship ha South Korea

Shillong, Jymmang 08 : Ka Jylla Meghalaya ka la ïoh ban pynmih ïa ki nongïalam kiba tbit ha ka liang ki kam jingïalehkai sports, ym tang kiba kyntiew ïa ki jingïalehkai hapoh ki District bad State level, hynrei kiba kyntiew ruh wat ha ki National Level kumjuh da kaba ïoh ban ïalam ïa ki synjuk ïalehkai jong ka ri India sha ki jingïalehkai kiba long shabar na la ka jong ka ri.
Kane ka la wan jia sa ha ka jingïalehkai Athletics, ha kaba ka Athletics Federation of India ka la jied ïa u Bah Finely L Pariat uba dei u General Secretary jong ka Meghalaya Athletics Association (MAA) bad jong ka Meghalaya State Olympic Association (MSOA), kum u Manager jong ka kynhun ïalehkai ka ri India kaban sa ïashim bynta ha ka Asian U20 Athletics Championship kaban sa long ha South Korea naduh ka 4 tarik haduh ka 7 tarik u Jylliew 2023.
U Bah Finely L Pariat udei ruh uba nyngkong na ka Athletics uba ïoh ïa kaba kum katei ka kabu ban ïalam ïa ka kynhun ïalehkai Athletics jong ka ri India ha kaba kum katei ka Championship. “Nga ainguh eh ïa u Blei uba la plie ka lad na bynta jong nga ba ngan ïoh ban ïalam ïa ka kynhun ïalehkai ka ri India. Nga ai khublei ruh ïa ka Athletics Federation of India kaba la ibit ba ngan long kum u Manager jong ka kynhun,” ong u Bah Finely Pariat halor katei ka jingshah jied ban long kum u Manager.
“Kane ka long ruh ka jingsngew sarong bad ka burom kaba khraw na ka bynta ka Jylla jong ngi ba ka ri India ka la sdang ithuh ïa ngi kiba dei na ki Jylla barit,” la ong u Bah Finely L Pariat.