Shillong, Jymmang 08 : Ka kynhun kaba 20 ngut ba la ïalam da u Bah Dipshon Rynthathiang, Chairman, MSOA Podium Finish Committee, ha ka jingïadonlang ryngkat u Bah John F Kharshiing Working President jong ka Meghalaya State Olympic Association na ka MSOA ki la bteng biang ïa ka Phase-2 Sports Talent Identification ha ka 8 tarik Jymmang 2023, ha Demdema C&RD Block, West Garo Hills District, ha ka madan basketball hapoh St Francis School, jong ka shnong Mronggre.
Katei ka shnong ka jngai kumba 80km na Tura sha jan ka thaiñ Phulbari. Kane ka jingbteng ka la long hadien ar taïew mynshwa la khang ïa ki skul hapoh Ri Lum Garo na ka daw jong ka jingkhluid palat ka suiñ bneng kaba ha kato ka taïew ka jingkhluid ka la poi haduh 44c degree ka jingkhluid, hynrei mynta ka la kham duna bad ka jingkhluid ka long kumba 36c degree.
Ka STAR Talent Identification Program kaba la pynlong da ka Meghalaya State Olympic Association hapoh ka jingïatreilang bad ka tnad Sports and Youth Affairs, jong ka Sorkar Jylla hapoh ka jingkhmih jong ka Edge10-Sportality kaba la ïarap ban pynïaid ïa kane ka program ha ki C&RD Block.
Ki phra tylli ki school kiba la ïashim bynta ha ka STAR Talent Identification program ha ka 8 tarik Jymmang 2023 ki long ka skul St. Francis School, Shyam Nagar Govt LP school, Kalapani Secondary School, Shyam Nagar Govt UP school, JN Higher Secondary School, Gime New Model Govt School, Gimegari Deficit Secondary School bad ka Chambakpara Govt. LP School kiba hap hapoh ka Demdema C&RD Block, West Garo Hills District, Meghalaya.
La ïoh ban test kumba 225 ngut ki samla kynthei bad shynrang naduh ka rta kaba 10 snem haduh 18 snem ha kaba la phah ïa ki ban ïalehkai ïa ki saw tylli ki jingïalehkai kum ka (test) ha kaba la thew thik pa thik da ki kor stad (digital equipment) kiba la wanrah na Australia bad UK.
Kumban shu pynkynmaw ha ka phase-1 la test kumba 4541 ngut ki samla nongïalehkai bad ha kaba la shah jied kumba 200 ngut kiba tbit kiba la poi shakhmat ha ka ranking ban poi sha ka Elite Pathway Program kaba shi snem.
Namar ki jingkyrmen kiba mih na kane ka rukom wad talent ka Department of Sports and Youth Affairs ki la bteng ïa ka STAR program ban test sa kumba shiphew hajar ngut ki samla ïalehkai hapoh ki C&RD Block level. Haduh kane ka sngi na ka phase-2 la dep test kumba 7500 ngut na ka shiphew hajar ha baroh kawei ka jylla Meghalaya.
Ynda la pyndep ïa kane ka phase-2 STAR Talent Identification Program u Ian Campbell, Olympian bad ka kynhun jong u kin sa ai ka kaiphod kaba bniah halor ka jingshem ka result kaba kin sa phah sha ka Meghalaya State Olympic Association bad ka Department of Sports and Youth Affairs, jong ka Sorkar Jylla bad la khmih lynti ba nangne ruh kin dang mih shuh shuh ki samla kynthei bad shynrang kiban don ka jinglah ki bor ïalehkai katkum ki jingthew (benchmarks) ha ka kyrdan International.
Haduh kine ki sngi ka MSOA lyngba kane ka program kaba kyrpang ka la lap ïa ki samla ka jylla kiba don ki sap kiba kyrpang bad kaba donkam ka long ban nang ai ki lad jinghikai kiba kyrpang ïa kitei ki samla kiba la shem kiba don ka sap kaba ïa ryngkat bad ki nongïalehkai ka pyrthei.
Kumba ka long kane ka program ka la plie lynti ïa ki coach, Asst Coach, ki grassroots coach ban ïoh ban tip ïa kiba donkam ki rukom ai jinghikai lyngba kine ki nongïalehkai kiba mih madan ha ka Olympic kiba la paw kiba la im sngi ha ka kam ban kyntiew ïa ki nongïalehkai bad ïa ki nonghikai.
