Shah ïalam bakla u paidbah ha ka jingkynnoh ba ïadei bad BJP sa rem ka NPP ha elekshon MP Lok Sabha

Shillong, Naiwieng 24 : U State President ka National People’s Party (NPP) Meghalaya , u Bah Prestone Tynsong uba dei ruh u Symbud Myntri Rangbah ba dei khmih ïa ka tnad Kam-Pohïing ka Sorkar Jylla, u la ong ba ka elekshon MP ka pher na ka elekshon MLA bad MDC bad ka jingshah rem ka Party ha ka elekshon MP Lok Sabha na Shillong Parliamentary Constituency bad Tura Parliamentary Constituency myn ha ki bnai ba la dep ka dei namar ba ki paidbah ki shah ïalam bakla ha ki khubor bym shisha khamtam ha ki rynsan Social media da kaba kynnoh ba ka NPP ka dei kajuh bad ka BJP.
Kane ka jingkynthoh Bah Prestone ka la wan halor ka jingkylli na u nongthoh khubor ha ka janmiet 23 tarik u Naiwieng, 2024 halor ka rukom long ka result elekshon MP Lok Sabha na baroh ar tylli ki Parliamentary Constituency ha kaba ki kyrtong ka NPP ki la shah rem bad mynta ka sngi pat ka NPP ka ïoh jingjop na ka elekshon shiteng samoi na Gambegre Constituency lyngba ka Dr Mehtab Chandee A Sangma, ka kurim u Myntri Rangbah ka Jylla, u Conrad K Sangma.
U Bah Prestone u la ong ba ka don ka jingïalam bakla da kiwei pat ki seng saiñ-hima ban ong ba ka NPP ka dei ka BJP bad ka BJP ka dei ka NPP watla ki don la ka jong ka Riti Treikam. U la ong ba ka BJP ka kyrshan ha ka elekshon MP Lok Sabha ïa ka NPP namar ba ka khlem sei kyrtong. Hooid ka jingïatrei lang ha ka sorkar MDA bad ha ka sorkar NDA ka don hynrei kane kam mut ba ka NPP ka dei ka BJP bad ka BJP ka dei ka NPP. Baroh ar ki party ki ïapher bad ki don la ki jong ki nongrim treikam. Kane ka dei ka jingkynnoh ba khlem nongrim jong ki briew namar ka NPP ka dei ka National Party kaba tang marwei hi na kane ka thaiñ shatei lam mihngi ka ri India, ong u Symbud Myntri Rangbah bad President ka NPP Meghalaya.