Nongpoh, Naitung, 19: Namar ka jingshah weng kam bad shah pynsangeh treikam ïa ki lai ngut ki nongtrei Khasi kiba la trei la palat 10 snem hapoh ka ophis jong ka Indian Council for Agricultural Research (ICAR) Umïam, Ri Bhoi District ba kynthup ïa kawei ka longkmie bad arngut ki rangbah, ki nongïalam jong ka Confederation of Ri-Bhoi People (CoRP) hapoh ka jingïalam jong u President u Bah Bandari Ryntathiang ki la leit ban ïakynduh ïa ki bor ba dei peit ban ïoh jingshai halor ka jingshah wengkam kine ki lai ngut.
Ki nongïalam ka seng ki la leit ban ïa kynduh nyngkong ïa uwei u Saiantis uba la tip kyrteng kum u Dr B.U. Choudhury uba dei peit ruh ïa ka tnat Water kaba don ki nongtrei Khasi kiba la shah beh kam hynrei namar ka jingkren kyllaiñ jong u, ki nongïalam ka seng kim shym la hun satia bad ki la leit ban ïakynduh noh ïa u Chief Administrative Office (CAO), Senior Grade GG Harakangi bad u Gauranga Ghosh uba dei u Senior Finance and Account Officer ban ïakren halor kane ka jingeh.
Ha ka jingïakren bad ki nongthoh khubor, u Bah Bandari Ryntathiang u la pynpaw ïa ka jingsngewkhia kaba jur bad ka jingbitar halor ka jingleh jong ka ICAR na ka por sha ka por ban shu weng kam khlem nongrim ïa ki nongtrei Khasi da kaba ai daw ba ka kontrak jong ki ka la kut noh, hynrei ha ka jaka jong ki la wanrah pat da ki briew kiba nabar jylla.
U la ïathuh ruh, ba katkum ka jingtip jong ka Seng ki bor pynïaid jong ka ICAR ki ju wengkam ïa ki Khasi tang namar ka jingwan jong kino kino ki Scientist ne ki ophisar kiba na kiwei kiwei ki jylla kiba ju wan ïalam lang ruh ïa kiwei pat ki nongtrei nabar jylla ha ryngkat bad kine ki ophisar da kaba weng kam pat ïa ki nongtrei khasi kiba la trei bun snem ha katei ka jaka da kaba ai daw ba ka projek ka la kut bad ym don pisa ban siew tulop ïa ki hynrei ïa ki bar jylla kiba treilang ha kata ka projek pat ki ailad ba kin rung sha kawei pat ka projek kaba wan thymmai ban bteng ïa ka jingtrei.
Hadien ka jingïakynduh bad ki nongïalam ka seng, na ka liang jong u CAO u la kular ban shimkhia ïa kane ka kam bad kular ruh ban khot da ka jingïalang bad u Director ban thungkam biang ïa ki lai ngut ki khasi ba shah weng na ka kam.
