Shillong, Naitung, 19: Ka National People’s Party (NPP) shen kan shong ban rai ïa ka kyrteng jong u kyrtong na ka Shillong Parliamentary Seat ban aireng ha ka elekshon Lok Sabha ka ban sa long shen.
“Nga tharai ha kaba kut u bnai Nailar lane Nailur, ngin sa lah ban ïathuh ïa phi ïa u kyrtong (na ka bynta ka Shillong Seat,” ong u Nongïalam ka NPP u Bah Sniawbhalang Dhar ha ka jingïakren bad ki lad pathai khubor ha ka sngi Balang.
U la ong ba ka Party ka la don lypa ïa ka Sitting MP na Tura ka Agatha Sangma. “Mynta ngi hap ban rai ïano ban sei na ka Shillong Seat,” ula bynrap.
U la ïathuh ba ki don kumba 20 ngut kiba la pan tiket na ka NPP ban ïakhun ïa ka elekshon MP na ka Shillong seat.
Haba kylli, u la ïathuh ba ka NPP kan sa pan jingkyrshan na ki paralok kiba ïatreilang hapoh ka MDA ha ka elekshon MP. Ha kajuh ka por u la ïathuh ba ka NPP ka la pynkhreh ruh na ka bynta ka elekshon ha KHADC bad JHADC.
