Nongstoiñ, Naitung, 19: U Deputy Commissioner ka West Khasi Hills District ha ka kyrwoh khubor ba la pyllait mynta ka sngi, u la ïathuh ba ha ka 18 tarik u Naitung 2023, sa lai tylli ki karkhana saiñ dewiong beaiñ coke plant ha Nonglangpar (Kyllonmathei) la dep ban pynpra biang da ka District Administration.
Kine ki karkhana saiñ dewiong beaiñ ki dei kiba don ïa ki GPS coordinates 25.4972618, 90.9020125, 25.4978283, 90.9024058 bad 25.4985867, 90.9039470. U Deputy Commissioner u la bynrap shuh shuh ba ka jingpynpra ïa ki karkhana saiñ dewiong beaiñ kan dang ïai bteng.
Kumjuh ruh na ka liang ki heh pulit ka District, ha u kyrwoh khubor sha ki lad pathai khubor mynta ka janmiet, la ïathuh ba ha ka 19 tarik Naitung 2023, kumba hynriew tylli la dep ban pynpra. Kumta haba kheiñ lang ïa kiba mynnin bad mynta ki long 9 tylli ki karkhana ba shah pynpra ha ki ar sngi.
