Shillong, Naitung 19 : Ka Meghalaya High Court ha ka sngi Balang ka la bthah ïa ka sorkar jylla bad ruh ïa ka National Highway Authority of India ba kan phah ïa ka jubab haba ïadei bad ka surok Jowai sha Ratacherra kaba hap ha ka National Highway – 6, hapoh ka saw taiew.
“Baroh ar, ka sorkar jylla bad ka NHAI ki dei ban phah ïa ka kaiphod ha ka sien shong bishar hadien saw taiew ban wan,” ong ka Division Bench ha ka hukum hadien ba la dep ban bishar ïa ka PIL ba ujor da u Bah Kynjaimon Amse.
La bthah ruh ïa ka sorkar jylla ban lum ïa ka jingïalang bad ki nongmihkhmat ka NHAI bad ruh ki bor ba dei peit ban peit halor katei ka jingeh kaba ïadei bad katei ka surok Jowai – Ratacherra jong ka NH-6.
U nongujor u la kdew ruh ba ka report ba phah da ka NHAI ka kdew ba ki don katto katne ki jingeh kiba mih kiba donkam ban tuklar da ka sorkar jylla.
La kdew ruh ba ki don ki jaka sait kali kiba la mih ha shi lynter ka surok bah ha ka jylla khlem kano kano ka nala um lane kino kino ki lad kumba donkam ban leh. Shuh shuh la ong ruh ba dei na kane ka daw ba ka um na kitei ki jaka sait kali ki tuid sha ki surok bah bad wanrah ka jingduh ïa ka surok kham jur ban ïa kaba u lapbah u pynduh.
Ka NHAI ha ka report ka kdew ruh ba ka jingpyndait ïa ki pipe harud surok lynter na Jowai sha Ratacherra ka la lait um ha ki bun jaka kaba long ka daw ban lang ka um bad khoh noh ka rong.
La ong ruh ba kitei ki mat nalor kiwei kiwei ki ishu kiba la kdew ha ka report jong ka NHAI dei ban peit da ki bor sorkar na kato ka jaka bad ban don ruh ki kyndon na bynta ki jaka sait kali ba kin hap ban bud kynthup ka jingsiew ïa ki bai laisen ne kino kino.
Haba ïadei pat bad ka Jowai Bypass, ka Bench ka la bthah ba ka jingmaramot dei ban pyndep noh hapoh une u bnai.
Shuh shuh la ong ba la khmih lynti ba ka jingpyndep ïa ka kam kaba sah yn pyndep noh hapoh une u bnai bad pyntikna ban pyndep noh ïa ki jigmaramot ha ki jaka ba i donkam..
La ong ruh ba ka jingeh kaba ïadei bad ka surok ba 7KM kaba ym lah ban ïaid kali mynta kaba la tip kum ka Jowai Bypass kaba pynïasoh ïa ka Thadlaskein sha Mihmyntdu bad ki kali kiba thmu ban leit sha Khliehriat khlem da sangeh ha Jowai ki pyndonkam da katei ka bypass ban kiar na ka jingkhapngiah ha Jowai.
La ong ruh ba baroh ka surok NH-6 la peit da ka NHAI, ka surok ba 7km jong ka Jowai Bypass kadei kaba peit da ka tnad PWD Roads bad kumta katei ka surok mynta ka la sniew bha kaba pynlong ïa ki kali heh bunsien ban kynduh jingeh katba kiwei pat ki kali ba kham rit ki leit noh naka surok kaba kham jngai lyngba ka Jowai ban ïa kaba leit na katei ka surok ba sniew na Bypass.
Shwa kane, ka sorkar jylla ka la jubab ba ka jingjur u lapbah ha u Jylliew 2023 kam shym la ailad satia ïa ka jingmaramot ïa ka surok kaba la trei hashwa, kaba khoh lut jingsïang rong.
La ong ruh ba ujuh u kontrakor u leh ïa katei ka jingmaramot bad ïa katei ka kam yn pyndep noh kham kloi.
Hynrei na ka Bench pat ka la ong ba jan marshiteng na ka Lyiur ka la kut bad ha kine ki por ka bypass kam shym la lah ban ïaid kali.
