Ther ka ïing bishar HC ïa ka sorkar halor ki kyndon MW(PC) ba dei tang ka jingpyndep rukom

Shillong, Naitung 19 : Ka ïing bishar High Court jongka jylla ha ka sngi Balang, ka la ther tyngeh ia ka sorkar da kaba ong ba ki kyndon jongka Meghalaya Waterbodies (Preservation and Conservation) Guidelines, 2023, ka dei kaba la shu leh tang dep rukom namar ka jingklet ïa ka mat ba kongsan eh kiba ïadei bad ki jingmih ki ïing bad ki jingtei harud jong ki Wah hapoh ka Jylla.
Haba shong bishar ïa ka PIL halor ka jingkhuid jong ka pung Umiam, ka Division Bench ka la ong ba ka Meghalaya Waterbodies (Preservation and Conservation) Guidelines, 2023, kam shym la kren eiei bad ka mat ba kongsan bha halor ka jingmih ki ïing bad ki jingtei ba kum ki tit harud jong ki Wah.
Ka la ong ba ka kyndon (guideline) ka la pynpaw ba ïa ki jaboh, jabaiñ bad ki lyngkhot lyngkhai lah ban nym bret shapoh ki wah hynrei kaba lyngngoh pat ba long ba ïa ka kyndon la pynmih khlem da kdew pat ba haduh katno ka jingjngai na ka rud jong ki Wah ba lah ban tei jingtei.
“Haba lyngkot hi, ka kyndon jong u snem 2023 ba la pynmih da ka Jylla ka paw ba ka dei tang ka jingpyndep rukom khlem da kren eiei ïa ka mat ba kongsan bha. Ka Jylla kan hap leh kham bha ïa kane” ong ka ïing bishar haba bthah ïa ka Jylla ban ai shuh shuh ïa ka kaiphod hapoh ka hynriew taiew.
Ka la bthah ruh ba ka jingkhang ban pyntrei ïa ki jingtei harud ki wah kan dang ïai bteng tad haduh ba ka Jylla ka la lah ban leh eiei halor kane ka kam da kaba wanrah ïa ki kyndon kiba kham janai.
Ka ïing bishar ka pynpaw ba ha ki hukum ba la pynmih teng ka la paw ba ka Jylla ka la thaw ïa ka Expert Committee. Katto katne na ki jingai jingmut jong ka Expert Committee la pynpaw ha ka affidavit ba la ai da ka Jylla hynrei kam shym la shai pat ba haduh katno kine ki jingai jingmut ki dei kiba shong aiñ.
Kala pynpaw ruh ba ka Jylla kam shym la shim ruh ïa ki jingai jingmut ban pynthikna ba ka sawdong sawkun harud jong ki Wah kin ym shah pynjot ha ka kyrteng ban kyntiew ïa ki kam jngohkai lane ban tei jingtei.
“Ki kyndon ba la wanrah da ka Jylla kumba la pynpaw ha ka affidavit kam shym long kat kum ka jingkhmih lynti lane ki sienjam ba donkam ban shim ha ka ban ïada ïa ki wah khamtam ka pung Umiam” ong ka ïing bishar
Ka ïing bishar ka la ong ruh ba ka Jylla kan hap pynpaw ïa ki sienjam ba ka la shim ha ka ban tehlakam ïa ka jingpom pathar ïa ki dieng naba la paw ba ka jingpom ïa ki dieng bad ka jingmait ïa ki lum ka la ïaid ha shilynter jong ki Highway hapoh ka Jylla na ka bynta ban tei jingtei.
“Watla, ka Sorkar, ka la kam teng ba ka Jylla ka don palat 75 % ki khlaw hynrei kan sngewtynnad shibun ban pynthikna ba ka la don ne em ka jingsorjamin ba dang shen halor kane ka kam bad ïa ka kaiphod ban wanrah hakhmat ka ïing bishar” kala ong.
Ka ïing bishar ka ong ruh, namar ka jingbym don kino kino ki lad ïohkam ïohjam bad ha ka kyrteng ban kyntiew ïa ki kam jngohkai, ym dei ban pynjulor ïa ka jingitynnad ka mariang jong ka Jylla bad ba ka Jylla ka dei ban leh eiei halor kane ka jingeh.