Shillong, Naitung, 19: U MLA jong ka North Shillong Constituency u Bah Adelbert Nongrum ha ka sngi Balang u la ai jingmut ïa ka Meghalaya Public Service Commission (MPSC) ba kan pyntreikam shakhmat ïa ka Roster ha kaba ïadei bad ki post Meghalaya Civil Sevice (MCS) ba la pynbna dang shen.
“Kum u nongmihkhmat kam mut tang ba ngi shu kynthoh ïa ki jingduna, hynrei ngi ai jingmut ruh ban pynbha, bad ngi hap ai jingïaroh haba dei. Nga ïohi ba ka MPSC ka la Re-advertise ïa ki post Meghalaya Civil Service (MCS) ba 35 tylli da kaba pynlong Prospective ïa ka Roster bad pyndam noh ïa ka Advertisement barim, ha kaba la lap ïa ka jingnoh shiliang ha ka bhah thungkam, kata 14 tylli ki Vacancy na bynta ki paid Garo bad tang 11 tylli na bynta u paid Khasi-Jaiñtia,” ong u Bah Adelbert Nongrum ha u kyrwoh.
“Ha kato ka por nga la kren hakhmat ki lad pathai khubor bad buh jingkylli ïa ka jingbakla ka Roster System da kaba pynii nuksa. Kumta haba nga ïohi ïa ka Advertisement MPSC bathymmai ha kaba ïa ka bhah thung kham la mang mar katjuh, kata mar 14 tylli ki post hapdeng ki Khasi-Jaiñtia bad ki Garo, nga dap da ka jingkmen bad jingsngewhun,” u la ong.
“Nga ngeit skhem ba kane ka jingpynbna biang ïa ka Advertisement ïa ki post lait kam da ka MPSC ka long tang ka jingsdang ban pynbeit ïa ka Roster System ha ki tnat treikam bapher ka Sorkr bad nangne shakhmat nga kyrmen ba ka MPSC kan pynbna biang da kawei ka Advertisement ruh ïa ki post LDA Secretariat, Veterinary Officer bad Junior Divisional Accountant ter ter; kumjuh ruh nga kyrmen ba ka Central Recruitment Board ka Meghalaya Police kan Re-advertise ïa ki post Constable ba lait kam, khnang ba ki khun samla ka jylla kin nym duh ïa la ka hok la ki dei na kano kano ka kynhun jaitbynriew ruh,” la ai jingmut u Bah Adelbert.
