Nongpoh, Jymmang 02: Ka Khasi Student Union, North Khasi Hills District kum kawei naki seng kaba peit ïaka bha ka miat ki samla pule, kala pynpaw ka jingsngewsih bad sngewkhia kaba jur halor ka jingkhlad jong ka samla Walinda Binong ha jaka sah jong ka ha Mody University jong ka jylla Rajasthan, kaba la pynshaïong ngaiñ ïaka ïing ka sem bad ki baïeid ba thoiñ baroh, kiba la suba sniew ruh baka jingïap ka lah ban don kaei kaei sha lyndet.
Halor katei ka jingkhlad katei ka samla kaba khlem ai jinghun ruh ïaka ïing ka sem bad ka jingbym sngew lah ngeit halor ka jingshim jong ka ïaka jingim da kaba dih bih bad sdien ha u tyllai phasi kumba la kam da ki bor pynïaid jong ka Mody University, ha Rajasthan, naka liang ka seng KSU kan sa leit ban ai syndon da ka jingthoh sha u Myntri Rangbah duh ka Ri u Narendra Modi bad kumjuh ruh sha u Amit Shah Myntri kam pohiing ka Ri ban shimkhia ban pynlong ka jingtohkit kaba bñiah ban lap ïaka daw tynrai bad ka jingbishar kaba hok halor ka jingkhlad katei ka samla.
Haba kren sha ki lad pathai khubor naka liang u Samla Ferdinald Kharkamni hadien ka jingïakren bad u kpa jong katei ka samla lyngba ka telephone u la pynpaw ka jingsngewkhia kaba jur halor ka tei ka jingjia ka bym poi pyrkhat ba katei ka longiing kan duh noh ïala ka jong ka khun baïeid ba thoiñ, da ka jingkhmih lynti ba kan ioh ka jingnang jingstad ha katei ka jaka ba ka pule, jngai nala ïing pynban u lyoh ba dum u la wan ban kah ïaka ïing ka sem jong ka samla Walinda hadien ban aka liang ka ïing ka sem ki la ioh pynban ka khubor ba sngewsih ba katei ka samla kala khlad noh da kaba dih bih bad sdien ha u tyllai phasi kumba la kam da ki bor pynïaid katei ka skulbah kaba la mih ruh bun ki jingkylli kumno katei ka samla ka dih ïaka bih bad kasa leit ban sdien ha u tyllai phasi.
Naka liang ka seng kala pyrshang ruh ban buddien ïa katei ka jingkhlad katei ka samla lyngba u kpa jong ka, bad kumba la ioh jingtip lyngba ka post mortem nalor ka dak mong ha ryndang kala don ruh ka jinglait jong ki shyieng kti jong katei ka samla bad ka ki dak jngem haka kjat jong ka.
Dei halor katei ka nongrim naka bynta ka jingshngaiñ jong ki samla pule kiba sah shabar jylla bad kumjuh ruh ki samla kiba leit trei, bad ki kmie ki kpa kiba phah pule ïala ki jong ki khun shabar jylla, naka liang ka seng ka dawa naki bor bahalor naduh ka sorkar jylla bad ka sorkar pdeng ba dei ban shimkhia ïa katei ka kam ban pynlong ka jingtohkit kaba bñiah ba katei ka longiing kan nym sahkut haka jinglyngngoh hynrei ban ioh ka jingbishar kaba hok bad naka liang u kpa jong katei ka samla u la kular ruh ban ai ka jingïatreilang bad ka seng naka bynta ban buddien ïa katei ka kam, kumba ka ïing ka sem haduh mynta kam pat sngew lah ngeit ba katei ka samla kam don shuh ha kane ka sla pyrthei.
Hakajuh ka por naka liang ka seng ka phah ruh ïaka jingsngewnguh bad khublei ïaka KSU Delhi Unit kaba la shimkhia ban synran lang ïaka ïing ka sem jong katei ka samla haka por ba ki leit shaw ïaka met jong ka samla Walinda ban wanrah noh sha ïing.
