Hiar jurip ka KYKWM ïa ka jaka tan umbam ka sor Jowai na ka wah Umngot

Jowai, Jymmang 02: Kawei na ki kynhun treimon sngewbha kaba peit ïa ka bha ka miat ha ka imlang ka sahlang ka “Khooid Ya Ka Wah Myntdu” mynta ka sngi kala hiar sha ka Wah Umngot (Water Supply Scheme) ban jurip dalade ïa ka rukom tan ïa ka umbam na katei ka Wah sha ki nongshong shnong ka sor Jowai.
Na ka liang kane ka kynhun hapoh ka jingïalam khmat u President ma K.L. Pariat ryngkat ki dkhot jong ka, ha ka jingdonlang u General Secretary ka Synjuk Waheh Shnong Ri Jaiñtia ma Bishar Shylla, u SDO ka PHE Electrical ma Roskil Challam ki leit jurip nyngkong ïa ka dam um jong katei ka Project ring Umkor na ka Wah Umngot kaba la den ha katei ka Wah.
Kane ka kynhun kala sakhi ba kane ka dam ka don mynta hapdeng ka jingshong synjor, wat na ka liang katei ka ophis la shu pyndap da ki maw bad u shyiap na shilliang ba den ïa dam, ban khang lad ïa ka um ban tuid na kitei ki jaka bala shah pynjulor ha ka umsaw.
Ha ka por shiteng sngi kane ka kynhun kala ïoh lad ban sakhi ruh ïa ka rukom Pump umbam na katei ka wah bad la ïohi ba ki tiar ki tar kila long kiba treikam, hynrei kaba shitom pat ïa katei ka tnad ban Pump ïa ka umbam ka long na ka daw ka jingbym biang bha ka rukom pynmeh ïa ka bor ding (loadshedding).
Na ka liang u SDO ka PHE ula ong naduh ba la sdang ban pump ïa ka umbam na wah Umngot la lah ban pyndap pynbiang ïa ki nongshong shnong ka Jowai, ula ong ruh ïa ka um ba Pump na ka wah Myntdu (Moopiah) la kham pynduna namar la pump beit kumba 12-14 kynta shisngi na ka Wah Umngot.
U ma Pariat ula ong kum ka jingbuddien mynta ka sngi ka long ban pyntikna ba ki paidbah ki dei ban ïoh ïa ka umbam kaba khuid ba suba da kaba pynsngew ba kim kwah ban ïoh ïa ka umbam na katei wah kumba long na ka wah Myntdu.
Ha kaba ïadei bad ka Dam um ha ka wah Umngot ula ong ba ka lah ban shah pynjulor namar ka jingbymbiang ka rukom shna ïa ka bad ka lah ruh ban shah rong ha kano kano ka por ba wan ha umsaw, ula ong ruh ba ka wah Umngot ka jaboh dei da ka daw ka jingtih maw na ki thaiñ East Khasi Hills bad ha ka por slap bad ïa ka khyndew ba sah la kit sha ki bynta ka wah.
Katba u ma Bishar Shylla ula buh ka jingkyntu ïa ki bor ba halor khamtam ïa ka sorkar lyngba kane ka tnad PHE ba kin pynbha pynmiat ïa kane ka jaka tan umbam ha Wah Umngot kaba dang donkam shibun ki jingpynbha, namar ïa u surok ban poi sha katei ka jaka ula long pynban uba sniew shaba palat bad kaba la pynshitom ïa ki kali ban ïaid wat ki kala heh kiba ïa ki tiar donkam.
Ha ka juh ka por u buh ka jingkyntu ïa nongïalam shnong hapoh ka sor Jowai ba kin wad ki lad ki lynti kumno ban pynïoh ïa ki jaka ban shna ïa ki Tangki um, khnang ba ka tnad PHE ka lah ban pyndap pynnbiang ïa ka umbam um dih ha kylleng ha sor Jowai da kaba kyntu ïa ki nongshong shnong ban ïatreilang na ka bynta ka jingbha jingmiat.