Shillong, Jymmang 02 : Ka Sorkar Jylla kan sa sdang noh shen ïa ka kam ban shimti bad pynbha ïa ki jaka ba julor na ka jingtih marpoh khyndew ha kylleng ki jaka ba don ki par marpoh khyndew ha ka Jylla.
U Myntri Rangbah Conrad K Sangma ula lum ïa ka jingïalang halor kane ka kam bad ki Heh Ophisar ka Tnad Mining bad ka Forest lem bad ki nongmihkhmat na ka Central Mine Planning & Design Institute Limited (CMPDI) mynta ka sngi ba-ar.
Hadien ka jingïalang, u Conrad ula ong “Kane ka dei ka jingïalang bala pynlong hapdeng ka CMPDI bad ka Tnad Forest & Mining bad ka jingthmu ba hakhmat eh ka long ban pynkhreh ïa ka plan ha ka ban pynbha pat ïa ki jaka tih marpoh khyndew la ki dei ki minor mineral (maw,shyiap ter ter) ne ki major mineral (dewiong, mawshun ter ter)”.
Haba pyntip ba ka don ka song pisa bad ka Sorkar ban pynbha pat ïa kine ki jaka tih marpoh khyndew, u Myntri Rangbah ula ong “ Kumta, kane ka dei ka kam kaba ngi kwah ban sdang bad ngi la dep ïakren bad bun ki Agency hynrei mynta bad ka CMPDI kaba dei ka agency kaba shemphang bha halor kane ka kam bad ka agency ka sorkar India kaba la shemphang ha baroh ki bynta”.
“Ngi la ïakren sani bha bad ki bad ngi la ïasyllok kumno ba ngin jam shakhmat halor kane ka kam ban pynbha pat ïa ki jaka tih marpoh khyndew” ula bynrap.
