Ba ai connection Gas khlem pat biang license yn pynphai noh u Bah ïalam ïa ka pisa ki paidbah
Shillong, Jymmang 02: U Bah Ïalam Makri uba dei trai ïa ka Ïalam Gas Agency ha ka sngi Ba-ar u la kular ban pynphai noh ïa ka bisa sha baroh ki paidbah kiba la aplai ban ïoh tydong lyer shet lyngba ka agency jong u namar na ka liang jong u um pat ïoh lut ïa ki kot ki sla kiba ïadei ban iaid shakhmat ïa ka jingsam tyndong lyer shet.
Haba kren sha ki lad pathai khubor u Bah Ïalam u la ong ba ka jingthmu jong u ban pynpoi lyer shet sha ki paidbah da kane ka Agency ka dei hadien ba ka Agency kaba u shait shim ka la pynpaw ïa ka jingeh ban pyndap ïa ka jingdonkam ki paidbah namar ka jingduna than ka supply.
“Hadien ba ka MLP Mawïong Gas agency kaba nga ju shim ïa ka gas ban pynpoi sha ki paidbah ka pynsngew ba kam lah shuh ban pyndap ïa ka jingdonkam Tyndong Lyer Shet ki paidbah bad ha kata ka por nga la ïa kynduh bad uwei u nongpynïaid ka Seujee LPG Distributor kaba na Guwahati u la kular ban pynbiang ïa ka jingdonkam Gas bad nga ruh nga la ïaid sha khmat ban leh ïa ka Connection sha ki paidbha hynrei dei hadien ba ka seng HNYF East Khasi Hills District ka la bat ïa ka kawei ka kali kit gas jong nga ba ki la pyntip ba dokam ban ïoh ïa ki kot ki sla na ka Indian Oil Co-operation bad dei hadien ba nga la sngewthuh ba kane ka kam ba nga leh ka dei pynban ka kam be-aiñ ba bad kumta nga la rai ban sahngeh noh syndon ïa kane,” u la ong.
Shuh na ka liang jong u, u la kular ban pynphai noh sha baroh ki briew kiba la apply gas na u ïa ka pisa kaba ki lut ha ka por ba ki apply.
“Ngan pynphai ïa baroh ka pisa kaba nga shim bad nga kyrpad ïa ki paidbah kiba la aplai ïa ka tyndong lyer ba kin sngebha ban pynphai noh tang u ïa u Tyndong thep Lyer Shet hynrei ïa ka Stove bad kiwei kiwei kiba ki ïoh ha ka por ba aplai ki lah ban buh noh bad ki, bad nga panmap ïa ki paidbah ïa kane ka jingbakla kaba na ka liang jong nga,” u la ong.
Ula ïathuh ba ka Ïalam Makri Gas Agency ka la shim pisa T.4500 naka bynta kawei ka tyndong lyer shet bad T.6500 na bynta 2 tylli ki tyndong lyer shet bad baroh kiba la pynrung kyrteng ha kane ka kompeni kin ïoh biang ïaka pisa kumba kila siew haka por aplai.