Kyntu u CM ïa ki paidbah ka Jylla ban phikir ïalade na u COVID-19

0

Shillong, Jymmang, 02: U Myntri Rangbah ka Jylla u Conrad K. Sangma u la kyntu ïa ki paidbah nongshong shnong jong ka jylla ba kin long kiba phikir bha ïalade na ka jingïabit ïa u khñiang jingpang COVID-19.
Kane ka jingkyrpad jong u Myntri Rangbah ka long ban ïada ïa ka jingsaphriang jong u COVID-19 ha ka jylla.
“Nga kyntu ïa ki paidbah nongshong shnong jong ka jylla Meghalaya ba kin ïai bteng ban bud ïa ki jingbthah da kaba deng ïa ki mask, ban pynïajngai iwei na iwei, bad ban long kiba leh khuid. Na ki jingjia kiba ngi ladep sakhi ha ki khyndiat bnai bad ha ki khyndiat taiew, mynta ka don ka jingïabit ba malu mala ïa u khñiang jingpang COVD-19 haba ïanujor bad ki bnai kiba ladep,” ong u Conrad Sangma ha ka jingïakren bad ki lad pathai khubor.
“Kane ka la kham pynsting ïa ngi khyndiat namarba mynta u khñiang jingpang um da long than uba kham shyrkhei kumba ha ki snem ba mynshwa,” la ong u Sangma.
U la ong watla ki dak ki shin na ka jingïabit ïa u khñiang jingpang COVID-19 ki lah ban long kiba shu malu mala, hynrei ka long kaba donkam ban shimkhia bad ban phikir bha ïalade khnang ban ïada na ka jingsaphriang jong une u khñiang jingpang ha Meghalaya.
“Kine ki dei ki kamram ba ki paidbah ki dei ban bud ryntih khnang ban pynthikna ba ngin long kiba la pynkhreh lypa ïa lade na kino kino ki jingjia kiba lah ban mih hadien habud,” la bynrap u Sangma.

Leave A Reply

Your email address will not be published.