Dang ïapynbeit u Conrad bad Himata ïa ka tarik ban ïakren pynbeit pud ka Megh-Assam

Shillong, Jymmang, 02: U Myntri Rangbah jong ka Jylla ha ka sngi Baar u la ïathuh ba shen yn sa pynbeit ïa ka tarik na ka bynta ban pynlong ïa ka jingïakren kaba nyngkong na ka bynta ka jingpynbeit pud ha ka wat kaba ar ïa kaba yn sa shim ïa ka rai.
“Nga la ïakren lyngba ka telephone la ar sien kynthih bad u Myntri Rangbah ka Assam. Ngi dang pyrshang ban pyrkhat ïa ki tarik bad kyrmen ba ngin dup lah ban pynsdang noh ïa ka jingïakren kaba nyngkong la kumno kumno hapoh une u bnai,” ong u Sangma ha ka jingïakren bad ki lad pathai khubor.
“Hynrei, ka dei ka lynti kaba kham jrong bad ngim lah ban shu khmihlynti ba baroh kiei kiei kin wan jia tang hapoh ka shi sngi hynrei la kumno kumno ka bynta kaba sdang eh nyngkong ngin sa pyrshang ban leh ïa kaba bha tam,” u la bynrap.
Haba pynpaw ba baroh arngut ki Myntri Rangbah kin sa buh ïa ka tarik ban ïakynduh, u Sangma u la ong, “ka bynta kaba sngewtynnat ka long naduh ba ngi la ïohlad ban ïakren markylliang ngin sa lah ban pynbeit noh shen ïa ka tarik Tang shu buh ïa ka tarik ngan pyntip beit ïa phi.”:
Ha ka 24 tarik Lber, ka Sorkar Jylla ka la thaw ïa ki lai tylli ki Regional Committees ki ban eksamin ïa ka jinglong jingman jong ki hynriew tylli ki jaka kiba dang sah ha ka jingïapynbeit pud bad ban phah ïa ki kaiphod jong ki hapoh 45 sngi.
Ki hynriew tylli ki jaka ba ïakajia pud ki kynthu ïa ka Langpih ha West Khasi Hills District; ka Borduar, ka Nongwah-Mawtamur, ka Deshdoomreah, ka Block-II ha Ri Bhoi District; ka Block- I, ka Psiar – Khanduli ha West Jaiñtia Hills District.