Shillong, Jymmang, 02: Ki Pulit ka Pasteur Beat House kiba dang ïaid pahara ha ka Lah Sngi U Blei ha ka por 5:30 baje janmiet ki la ïohbat ïa uwei u rangbah uba la tip kyrteng kum u Vishal Kupar Marngar uba la 30 snem ka rta na ka shnong Nongstoin Mawkawah, West Khasi Hills uba sah mynta ha Iew Garo ha Polo, Shillong, halor ka jingsuba ba u khaii drok.
Ha ka jingtalasi, ki Pulit ki la ïoh kurup 17 tylli ki tyndong ba la thep ïa u drok heroin bad ka pisa T. 480, la pyntip u Superintendent of Police jong ka East Khasi Hills u Bah Sylvester Nongtnger ha u kyrwoh ba la phah sha ki lad pathai khubor.
Ka kynhun ki Pulit Anti-Narcotic Task Force (ANTF) mar mar ki la leit sha Pasteur BH bad pynlong ïa ka jingtohkit katkum ki kyndon jong ka NDPS Act bad register case hapoh ka Section 21 (a) NDPS Act ha Shillong Sadar PS.
Halor kane, ki Pulit ki dang pynlong ïa ka jingtohkit kaba bniah ban lap ksai sa ïa kiwei pat kiba donkti.
