Wat ym ngop ha ki nongshukor aikam kyntu ki Pulit ïa ki samla kynthei

0

Shillong, Jymmang 02 : Ka Tnad Meghalaya Police kala pynmih ïa ka jingbthah ba maham ïa ki samla pule Kynthei ba dang ap result HSSLC ba kin phikir bha ïalade ban lait na ka jingpynngop jong ki nongshukor aikam.
Kane ka jingmaham kala mih hadien ka jingïoh khubor ïa ka jingdon ki nongshukor aikam ‘Air Hostess’ ïa ki katto katne ki samla pule kynthei ba dang ap result HSSLC.
Ki Pulit ki pyntip ba kine ki nongshukor ki pyndonkam ïa ka buit da kaba phone lane phah SMS sha ki samla pule, da kaba kam thok ba ki la shah jied ban long “Air Hostess” watla kine ki samla kim shym la aplai ïa ka kam.
Ka Tnad Pulit kala kyntu ïa ki samla pule bad ki Kmie Kpa ban phikir bad peitngor bha na kine ki kam thok kam shukor.
Kala kyntu ruh ba kin ai jingtip mar mar sha ki Pulit haba ïoh pdiang ïa ki phone call ne ki SMS, kynthup ki phone number jong ki briew ba phah.

Leave A Reply

Your email address will not be published.