Shillong, Jymmang 02 : U National President ka National People’s Party (NPP) bad Myntri Rangbah ka jylla Conrad K Sangma, mynta ka sngi Ba-ar ula pynpaw ïa ka jingsngew thikna ba u kyrtong ka Seng NPP u Bah Samlin Malngiang un ïoh khur ïa ka jingjop ha ka MLA Election na Sohiong constituency ka ban long la 10 tarik Jymmang.
“Ngi lah trei shitom bad ngi la ïaid ïalap elekshon ha kylleng ki jaka ka thaiñ Sohiong bad ngi sngewthikna ba ngin ïoh ïaka jingkyrshan ha ki shnong ki thaw. Bun ki nongïalam na ki seng saiñ pyrthei bapher bapher kila ïohi ïa ka rukom treikam jongka sorkar bad ka jingshisha ba ka seng NPP ka dei kaba ïalam ïa ka sorkar jylla” ong u Myntri Rangbah.
Ka Sohiong constituency ka pynkhreh ban leit sha ka jingïathep vote ha ka 10 tarik u Jymmang, ban jied ïa u nongmihkhmat sha ka ïing dorbar thawaiñ ka jylla.
Haba ïakren bad ki nongthoh khubor, u Conrad Sangma ula ong, “Ka jingshisha ka long ba ka National People’s Party ka ïalam ïaka sorkar jylla. Ka don ka jingsngewskhem jingmut kaba khlaiñ ha ki paidbah ka Sohiong ba ki kwah ban don bad ka seng kaba ïalam ïa ka sorkar, khnang ba ka Sohiong constituency kan ïoh pdiang kyrhai ïa ki kam pynroi”.
“Da kaba buh hakhmat eh ïa kitei ki mat, ngi la ïohi ba ka jingwan ai jingkyrshan jong ki paidbah ka long kaba biang bha bad ngi sngewthikna bha ban ïoh ïa ka jingjop” ula bynrap.
