La pynkhreh ïa ka jingtih dewiong lum u Myntri Rangbah ïa ka jingïalang

Shillong, Jymmang 02 : Ka jingtih dewiong da ka jingstad saian kala ap ban sdang noh hapoh ka Jylla hadien ba ka Sorkar India kala ai jingmynjur ïa ki mining lease jong ki saw ngut ki nongtih par.
Haba pyntip ïa kane mynta ka sngi ba-ar, u Myntri Rangbah Conrad K Sangma ula ong “Nga sngew kmen ban pyntip sha phi ba shitaiew lane 10 sngi mynshuwa, ka Sorkar India kala mynjur ïa ka mining lease jong ki 4 ngut ki nongtih par. Namar kata, ngi la lah ban jop ïa ka jingeh kaba khraw duh ba ngi la ïa kynduh ha ban lah tih dewiong da ka jingstad saian bad kat kum ka aiñ ha Jylla”.
ïa kane ula pyntip hadien ka jingïalang ba ula lum bad ki heh jong ka Central Mine Planning & Design Institute Limited (CMPDI) lem bad ka Tnad Forest bad Mining ka Jylla mynta ka sngi.
“Kumta, shisien ba ngi la dep pynlong ïa ka Public Hearing bad la ïoh jingmynjur ïa ka forest clearance bad mining plan kiba dei ki kam ba hap leh, ïa kiba ngi la khmih lynti ban dep hapoh 20-45 sngi, ngin sa ïoh jingbit ban sdang ïa ka jingtih dewiong da ka jingstad saian” ula ong.
U Myntri Rangbah ula ong “Hooid, ka jingpynreikam kan dei da ki nongtih par ki ban pyndonkam ïa ki kor ki bor ba donkam kat kum ka mining plan hynrei ka mat jong nga hangne ka long ba ka khyllipmat ba la ai ïa ka lease, kane ka dei ka sienjam ba kongsan namar hadien kata, kumba nga ong, ngi la jam ïa u mawjam ba eh duh bad mynta ngi la don ha ka lynti ban ïohi ia ka jingsdang tih biang ïa u marpoh khyndew ha Jylla”.
Haba kylli, u Myntri Rangbah ula ong ba mynta ka lynti ka la shai ba shano ka Jylla kan poi.
“La kumno kumno ruh ngin sa ïohi ïaka jingsdang tih dewiong da ka lynti ka aiñ. Shuwa kane, watla ngi tip ba ngi la ïaid ha kane ka lynti, hynrei ngim tip lano bad kumno kane kan urlong hynrei mynta kala shai kdar” ong u Conrad.
“Mynta nangne shakhmat ngin hap ban pynthikna ba ngin nang pynjanai ïa ka jingtreikam halor ki kyndon bala buh, ngin nang pynjanai, ngin nang pyniar, ngin nang ai bun ki licence bad mining lease sha ki briew khnang ban gin lah ïohi biang sa shisien ïa ka jingkiew ha ka kam tih marpoh khyndew kumba la long shuwa ka jingkhang jong ka NGT” ula bynrap.
Ha kajuh ka por, u Myntri Rangbah bad kiwei ki Myntri jong ka Sorkar MDA kin sa shah pynkup burom ha ki nongtih par ha Nongstoin mynta ka taiew.
“Ki Nongtih par kiba ïoh ïa ki mining lease kila khot ïa ngi sha ka jingïalang kaba rit ha kaba ki ïakwah ban pynkup burom ïa nga bad ïa kiwei ki Myntri jongka Sorkar kum ka dak ban pyni ia ka jingsngew nguh ïa ka jingshimkhia jong ka Sorkar ban pynthikna ha kaban poi haduh une u pud” ula ong.