Sha Secretariat byrngem tur ka JSU, JNC ban pyrshah ïa ka bishar paidbah ïa ka Shree Cement

Shillong, Jymmang 16 : Ka Jaintia Students’ Union (JSU) bad ka Jaintia National Council (JNC) ki la pynbna ba kin pynlong lang ïa ka jingïakhih bad ban ïatur paidbah sha Secretariat ha ka 18 tarik Jymmang, ban ïakhih pyrshah ïa ka jingthmu ka Meghalaya State Pollution Control Board (MSPCB) ban pynlong ïa ka public hearing ne ka jingbishar paidbah na ka bynta ka project tih mawshun ka Shree Cement ha Lum Syrman.
Kine ki artylli ki Seng kila ong ba ki ïeng ha syndah bad ki Nongshong shnong ka Daistong, Nongkhlieh Elaka, bad kynnoh ba ka kompani ka la pynjari kyndon jubor ïa ki nongshong shnong jong kane ka shnong ba kin pdiang ïa ka public hearing halor ka project tih mawshun ha Lum Syrman, kaba long ha ka jaka ba heh kumba 217.394 hectare.
Ha ka kyrwoh, ka JSU bad JNC ki la pynrem jur ïa kaei kaba ki batai kum ka jingbym kheiñ snep jong ka kompani ïa ka burom, ka hok bad ka jingsngewkhia jong ki paidbah ka Nongkhlieh Elaka.
Kine ki kynhun ki la kynnoh ruh ba “kane ka karkhana dewbilat ka don ïa ka jingpyrkhat ba ki briew bad ki jaka ha East Jaintia Hill ki dei kiba shah kheiñ kum ki jaka theh ñiut ha ki ba kin bret ïa ki jaboh jabain khlem da pyrkhat lang ïa ka bha ka miat, ka jingangnud bad ka jingmyntoi kaba hadien habud jong ki trai shnong”.
Ka JSU bad JNC ki la pynrem jur ruh ïa ka Sorkar MDA-2 halor ka jingkynnoh ba ïalam bakla ïa ki paidbah da kaba pyndonkam ïa ka Environment Impact Assessment (EIA) ba la pynkhreh haba pynshong nongrim na ki kyndon ha Gujarat ban pyntreikam pat ha Meghalaya”.