Ka long kaba ma lada khlem da pynshisha ban thied dawai online: MHCA

Shillong, Jymmang 16: U President Meghalaya Health Care Association (MHCA) u Bah David Kharsati u la ong ba ka All India Organisation of Chemist and Druggist (AIOCD) kaba dei ka seng ki nongdie dawai ha ka Ri India kin pynlong ïa ka jingïakhih ha ka 20 tarik mynta u bnai, 2026 da kaba sangeh ban die dawai ha katei ka sngi.
Haba kren sha ki lad pathai khubor utei u nongïalam ka seng kiba die dawai u la ong ba kane ka jingïakhih ka long ban pyrshah ïa ka jingdie ïa ki dawai online bad ka jingpynhiar dor palat ki kompeni, ka jingpyrshah ka long ba lada die ïa ki dawai kiba khlem da pynshisha bad ki dawai tad dor kaba ym lah ban tip kiba lah ban dei kiba la sniew ne kiba khlem da ïoh ki jingthoh kiba biang katkum ka koit ka khiah jong kiba pyndonkam.
Shuh shuh haba iadei bad kane u President ka MHCA u Bah David Kharsati u la ong ba na ka liang jong ki, ki kyrshan ïa katei ka jingkhot ka sengkmie, na ka liang jong ka Meghalaya Health Care Association kan ïa snoh kti lang ba kin sangeh ka jingdie dawai ha katei ka sngi ba don ka jingïakhih ha ka Ri India.
Na ka liang u Bah David u la ong ba kane ka jingïakhih kan ym ktah ïa kiba pang ba shitom, ïa ki jaka die dawai kiba don ha ki jaka ai jingsumar naba la pynlait ïa ki na kane ka jingïakhih, ka jingkyrshan ïa kane ka jingïakhih ka long ban ïada ïa ki nongdie lang bad ïa kiba die khutia ïa ki dawai dashin na ka jingshah ktah ha kane ka ïew die online.