Sha ophis treikam ka KHADC yn tur paidbah ki 21 shnong ba shah pynkynriah Constituency

Nongstoiñ, Nailur, 22: Ha ka sngi saitjaiñ ha ka jingïalang paidbah kaba ar ha ka shnong Nongmisei, ki paidbah na ki 21 tylli ki shnong ka West Khasi Hills, kiba hap hapoh ki lai tylli ki Polling Station, ki la rai ban leit tur paidbah sha ka Ophis treikam ka Khasi Hills Autonomous District Council Shillong, lada kam sngap ïa ka jingpyrshah halor ka jingpynkynriah ïa ki na Mawshynrut sha Rambrai-Jyrngam Constituency ha ka jingphiah pud thymmai ïa ki Constituency da ka Council.
Ka jingshim rai halor ban leit tur sha KHADC, ka la mih lyngba ka Joint Action Committee (JAC) ki 21 tylli ki Shnong kiba hap hapoh ki lai tylli ki Polling Station ka Mawshynrut ka Misei, Mawsmai bad Langdongdai.
Ha kajuh ka por na ka liang ki nongïalam jong ka JAC, ka la phah ruh ïa ka kyrwoh kaba shai kdar sha u Dy CEM ka KHADC bad Chairman ka Select Committee Bah P.N Syiem, ba lada ka Council kam pynphai biang ïa ki 21 tylli ki shnong sha Mawshynrut, ba la rah ha ka jingphiah pud thymmai ïa ki constituency, ki 21 shnong kin nang pynjur shuh shuh ïa ki jingïakhih.
Kum ban shu pynkynmaw biang hangne ba dang shen ha ka jingïalang ba long ha Langdongdai, kine ki 21 tylli ki Shnong ba la lamkhmat da ka JAC, ki la rai ruh ban nym ïashimbynta satia (boycott) ha ka elekshon MDC ka ba lah ban long ha u snem ban wan, tang na ka daw ka jingshah pynkynriah jubor ki lai polling station sha Rambrai.
Katba ha ka jingïalang kaba dang long shen ha Nongmisei, ki Sengbhalang bapher bapher jong ka thaiñ ki la wan ban ai jingkyrshan ïa ka jingïakhih jong ki 21 tylli ki shnong. Ki da buh ruh ka jingkylli ïa u MDC bad MLA ka Mawshynrut halor ka jingsngap man man ïa kane ka jingdawa kine ki Shnong.
Shuh shuh, ki Sengbhalang bad ki riew rangbah jong ka thaiñ ki la kyrshan ïa ka jingdawa ba dei ban pynhap biang noh ïa kine ki 21 shnong sha Mawshynrut constituency. Lym kumta ym banse ban ïaid shakhmat ïa ki prokram ïakhih pyrshah ïa ka KHADC.
Napdeng ki nongkren ha ka jingïalang, ki la pyntip ba ka JAC ka la dep ban phah da ka jingthoh haduh arsien arwat sha u Chairman ka Select Committee Bah P.N Syiem, ban pynpaw ïa kane ka jingpyrshah bad ban pan por ban ïakynduh hynrei la ong ba kim shym la ïoh jubab satia.
Kumta, ki paidbah na ki 21 Shnong ki la rai ban shu leit tur paidbah noh dalade sha KHADC ban pynsngew ïa ka jingpyrshah ïa kane ka jingshah pynkynriah constituency.