Nongstoiñ, Jymmang 01: Wat la ka jingpyntrei ïa ka surokbah na Nongstoiñ Rambrai haduh Kyrshai ha ka wat kaba nyngkong kam pat dep bha hynrei ka la pynsuk shibun ïa ka leit ka wan, ka kit ka bah jong ki paitbah katei ka thaiñ. Ha shilynter katei ka surok ki don tang saw tylli ki jingkieng ha kaba lai tylli la dep ban shna, kawei ka jingkieng kaba jrong tam na kitei ki saw tylli ka dei ka jingïeng lyngba ka wah Rambrai ha syndah jong ka shnong Mawthaw hynrei ka ba lyngoh ka long ba tang shisnem ym pat dap shi bynta na ka kynroh ha tduh jong katei ka jingkieng kaba kyrshan ïa ka foundation ka la orpait.
Kumta mynta ka sngi thohdieng ka 1 tarik Jymmang ki nongïalam ka FKJGP Rambrai circle hadien ba ki la ïoh jingtip na ki paitbah jong ka shnong Mawthaw ki la leit ban jurip bad la lap ba ka jing orpait jong katei ka kynroh ka dei na ka jingtrei torti jong ki nongtrei ka SPICA Kompeni kaba la shim kontrak ban pyntrei ïa katei ka jingkieng.
U Bah Fullmoon Marweiñ secretary ka FKJGP Rambrai circle haba ïakren bad u nongthoh khubor u la ong ba ka jingorpait jong katei ka kynroh ka buh jingma namar lada wan ka umsaw ha ha ka por lyiur ka kynroh ka lah ban twa bad ka umsaw kan khlong haduh ka foundation bad ka jingkieng ka lah ban kynriang ne hap shiliang.
Ha kajuh ka por u la ong ba na ka liang ka seng ka dawa ba ka SPICA Kompeni ka dei ban wan moramot bad pyntrei biang ïa katei ka kynroh bad halor katei ka jingtrei torti na ka liang ka seng kan sa leit ban ujor ruh sha ki bor ba halor.
Ha ka jingleit jurip ïa katei ka kynroh la synran lang ruh da u bah S.Myrthong sordar jong ka shnong Mawthaw. Halor ka jingorpait jong katei ka kynroh utei u sordar u la ong ba lada ka Kompeni kam pynkloi ban wan moramot ka buh ha ka jingma ïa ki ba ïaid ba ïeng namar ka don ha syndah jong ka shnong bad ki khynnah ki ïaid kai man ka khyllipmat mynstep, mynsngi bad wat ha ka por mynmiet ruh kumta lada jia ba katei ka kynroh ka twa kynsan ki khynnah ki lah ban hap shapoh bad ki jingjia ba sngewsih ki lah ban jia.
Ha kajuh ka por u la ong ba ha ka por lyiur ba jur bha u slap ka umsaw ka khlaiñ bha hapoh katei ka jingkieng bad lada ka jingpyntrei ïa katei ka kynroh kaba ha syndah jong ka foundation ka long kaba synjor kumba ka long mynta tang katto katne snem katei ka jingkieng ka lah ban kynriang.
Shuh shuh utei u sordar u la kyntu ïa ka Kompeni ba ka dei ban wan pyntrei biang ïa katei ka kynroh bad ka dei ban pyndepnoh kloi katba ka mariang ka dang ai lad khnang ba katei ka jingkieng kan neh bad ka skhem.
