Sha ki 96,812 ngut ki samla pule pyllait u CM ïa ka Post-Matric Scholarship ha kylla ba nyngkong

Shillong, Nailar 27 : U Myntri Rangbah ka Jylla, Conrad K Sangma mynta ka sngi u la pyllait paidbah ïa ka Umbrella Post-Matric Scholarship na ka bynta ki samla pule Schelduled Tribe jong u snem pule 2025-26 na bynta ka kylla ba nyngkong, ha ka prokram kaba la pynlong ha Shillong College ha ka jingïadonlang u Myntri ka Tnad Pule Puthi Bah Lahkmen Rymbui.
Na ka bynta une u snem pule, 96812 tylli ki aplikeshon na ki samla pule ST na kylleng ka Meghalaya lah dep ban pynshisha, da ka jingmang pynlut baroh lang kaba kot sha ka 198.42 klur. La ïathuh ba ka Ministry of Tribal Affairs, ka Sorkar India ka la pyllait ia ka bhah jong ka Sorkar Pdeng ba 84.55 klur, bad ka Sorkar Jylla kala pyllait 10 persen jong ka bhah jong ka kaba long 9.40 klur ban pynthikna ba kan nym don ka jingpynslem.
Baroh lang, 93.698 klur la pyllait ha ka kylla kaba nyngkong sha ki 96,812 ngut ki nongïoh bynta na baroh ki District, lyngba ka Direct Benefit Transfer beit beit sha ki bank account jong ki samla pule.
Haba kren ha ka jingialang, u Myntri Rangbah ula ong ba kane ka jingpyllait ka long kham palat ia ka pisa. “Ka dei ka bai skul ka ban sa siew noh ha ka por kaba biang, ka dei ka bai hostel ka ban nym tynrong ïa ka jingkit ha ki longiing longsem, ka dei ka kot bad tiar pule kaba ki samla pule kim donkam shuh ban khuslai ba kin ïoh, bad ka dei ka burom ba jar jar jong ki samla shynrang bad kynthei kiba lah haba khatduh ba kin pynleit jingmut ha ki jingpule,” u la ong.
U Myntri Rangbah ula batai ïa ka jingslem bad ka rukom pynïaid thymmai ïa ka pisa sha ki samla pule ryngkat ka jinglong ba shai. U la ong ba ha ki snem ba la leit, ka jingpyllait pisa na ka Sorkar India ka ju slem bha. Ha u snem ba la lah, ka Sorkar Jylla k ala pyllait lupa ïa ka pisa h ashuwa ka Khristmas na la ka jong ka pla tyngka bad hadien kala pynbeit ïa ka na ka pisa ba phah ka Sorkar pdeng.
Mynta u snem, ka Finance Ministry, ka Sorkar India ka la pyntreikam ïa ka Single Nodal Agency (SNA) ba thymmai ban pyllait ïa ka pisa ha ka por kaba biang. Hapoh ka SNA, ka pisa kam wan shuh sha ka Ministry lane sha ka Sorkar Jylla. Hadien ba pyndep ïa ki kot ki sla bad pynshisha da ka Jylla, ka Reserve Bank of India (RBI) ka la phah beit beit ïa ka pisa sha ka account jong ki samla pule.
“Mynshuwa, ka Ministry ka ju siew pat hadien ïa ngi. Mynta lada nga ai lypa sha phi, ka RBI kan phah beit beit ïa ka pisa sha phi, phin ïoh arshah. Kumta ka jingai lypa jong nga kala kut noh, hynrei ka lynti thymmai kala plie ban ai beit beit ïa ka pisa sha phi” ong u Myntri Rangbah.
“Ngi la pyndonkam ïa ka jingpynbor sain pyrthei bad pynthikna ba ïa ka installment ba nyngkong ba 40 persen la pyllait noh mardor. Kane ka dei kaba ngi pyllait mynta ka sngi”.
Shuh shuh la ïathuh ba ka RBI ka la kular ban pyndep ïa ka kam haduh 5 sngi kaba bun eh.
U Myntri Rangbah ula kyntu ïa ki samla ba kim dei ban khuslai lada ka SMS kam pat wan mynta ka sngi, haba pynpaw ba ki kam ki dang shu sdang mynta ka sngi da ka jingnion ïa u budam, watla ka jingdon ka shuti jong ka Raksha Bandhan, la sngi Saitjain bad Sngi U Blei.
U Myntri Rangbah u la ai ïa ka khubor sha ki 18 lak ki samla ba hapoh 20 snem hapoh ka Jylla. U la ong ba nalor ki kyrdan pule bad ki sap treikam, kaba donkam eh ha ki briew ka dei ka jinglah ban shim ïa ka jingkitkhlieh bad ban pyndep ïa ki kam.
U Myntri Rangbah u la pyntip ba ka National Scholarship Portal jong u snem 2026-27 kala plie ha ka 03 tarik Naitung, 2026 bad kan ïai plie haduh ka 30 tarik Naiwieng 2026, na ka bynta ki Pre bad Post-Matric Scholarship jong ki samla pule ST. La bthah ïa ki Ophisar ba kin sdang noh ban pynshisha bad ban mang pisa noh kham kloi khnang ban kiar ïa ka jingpynslem,
U la ai ruh ka jingkular ba ka Sorkar kan sa buddien ïa ka jingpyllait noh ïa ka bhah ba sah jong ka Sorkar Pdeng bad ka CM Scholarship kham kloi kat kaba lah.