Ka CWSSU kan ïaineh kum ka skulbah bapura bad yn ym don nabar kiba lah ban pynïaid: Lahkmen

Shillong, Nailar 27: U Myntri ka tnat Pule Puthi ka sorkar Jylla u Bah Lahkmen Rymbui u la ong ba kin ym don ki bor kiba nabar kiba lah ban pynïaid ïa ka jylla ne ban pynhiar dor ne kyrdan ïa ka jylla, naba ka jylla ka la lah ban leh hi dalade da ka jingtrei shitom dalade.
Ïa kane u la jubab ïa ka jingïatai nia kaba lyngkot ba la wanrah da u Myntri Rangbah barim ka jylla u Dr. Mukul Sangma hapoh ka Dorbar Synrai ha ka sngi Palei halor ka jingbym pat lah jong ka sorkar ban pyndap ïa ki kam ba lait kum ki professor, Associate professor hapoh ka Captain Williamson Sangma State University (CWSSU) bad kiwei ki mat kiba ktah ïa ka jingtreikam bad ïaid beit kane ka skulbah.
Ha shwa kane u Dr. Mukul u la ong ba ka Meghalaya kam dei kaba shah kheiñ poh ne kaba rit kyrdan haba nujor bad kiwei ki skulbah. U la ong ba ka jingïoh jingithuh jong u ne ka khynnah ka shong ruh ha ka jaka pule ne ka skul kaba u pule.
“Ka skulbah ka jylla kam dei ban shah pynïaid da ki katto katne kiwei pat bad ngi kum ki nongthaw aiñ dei ban khmih bad bishar bha ïa kane. Kumba long mynshwa ka Meghalaya kadei ban neh kum kawei na ki jylla ba bha tam ha ka pule puthi bad baroh kaba donkam ka long ban burom ïa kiba trei ne ki nonghikai da kaba ki ïoh ka jingsiew lyngba ka jingbthah na ka University Grant Commission naba ka Captain Williamson University (CWU) ka dei ka khyllung kaba nyngkong ha ka jylla, bad ka long ruh kaba kongsan ban pynlong kongsan ïa kiwei ki college ban pynïasoh bad kane ka skulbah ka jylla,” ong u Dr. Mukul.
Haba jubab ïa kine ki jingai jingmut, u Myntri ka Pule puthi u la ong ba watla ïa kane ka Skulbah la sdang naduh u snem 2011 bad ha u 2022 ka kynhun Myntri ka la mynjur ha kaba sdang kum ka Technical University hynrei hadien u snem 2024 la lah ban pynkylla sha ka State university bad tang hapdeng ki 3 snem mynta la lah ban pynïaid shakhmat ïa kiba bun ki jingdonkam ha kane ka skulbah.
“Ïa mynta ki nongtrei ki dei lyngba ka contractual basis bad ka jingeh hangne kam dei ka CUET bad ngi ithuh ïa ki jingdonkam jong ki khynnah pule,” ong u Myntri da kaba ïathuh ruh hapoh ka Ïingdorbar ba haduh mynta ki la don haduh 14 tylli ki college kiba la pynïasoh bad kane ka skulbah jong ka jylla.
Haba phai pat sha ka National Law Unversity, u Bah Rymbui u la ong ba kane ka dei ka skulbah ba pynlut hi dalade ym kum ka skulbah ka jylla.
“Ka State University kan ïaineh beit kum ka Skulbah kaba pura bad ka jingsiew ïa ki nongtrei kan long hi ha ka rukom kaba biang watla ym pat lah ban siew katkum ka UGC hynrei kan long pat ïa ka jingbha jong ki samla pule,” ong u Myntri ka tnat Pule Puthi.