Na ka 2 tyngka shi kilo mynta ki nongrep ki la kamai 20 haduh 25 tyngka shikilo: Conrad

Shillong, Nailar 27: U Myntri Rangbah ka Jylla Conrad K Sangma ha ka sngi Palei, ula ong ba ka dor jong u kubi, kaba la hiar sha ka T.2 shi kilo, kaba pynbor ïa ki nongrep ban shu sam ei, mynta ka la kiew biang sha ka T.20-25 shi kilo, bad ka jinghiar dor une u marrep ka ju jia bha ha u bnai Naitung naba jur bha ka jingphah ïa ki mar ban ïa ka jingdawa kumta naba ha une u bnai une u jhur u ju wan bad shalan bha na kiwei ki jylla kumta ka la pynlong ba un hiar dor
Ka la pynlong ïa u Myntri Rangbah ban ïathuh ïa kane ka mat naba kadei kaba la wanrah ha Ïingdorbar Thaw Aiñ da u President ka VPP bad MLA ka Nongkrem u Bah Ardent Miller Basaiawmoit kaba dei ruh ka mat na ka bynta ka bha ka miat jong ki nongrep ha ka jylla.
Haba ïarap ban ai jubab ïa u Myntri Kam Rep Timothy D Shra, u Myntri Rangbah ula ong ba ka jinghiar ka dor ha u bnai Naitung ka dei kaba ju jia man ka por kaba la ïohi ha kine ki 10 snem ba la leit noh.
U la ong, “Ngi la ju ïohi beit ïa ka jinghiar ka dor ha u bnai Naitung. Ka jingkheiñ ka long ba ka don ka jingwan pynpoi kubi kaba bun bha na kiwei ki Jylla ka thaiñ Shatei Lam Mihngi ha kane ka por. Ngi la khmih ïa ka jingpynpoi mar baroh kawei, kynthup ka Guwahati bad kiwei ki ïew.”
U la ong, “Ngim lah ban ong ba ka rukom pynïaid ka la eh haba pynshong nongrim tang ha ka shisngi. Ka jingpynpoi bun ka mar na kiwei pat ki bynta bad jingdon bun ka mar ka lah ban lam sha kane ka jinghiar don, hynrei mynta ka la kot biang sha ka T.20-25 shi kilo.”
U Conrad ula ong ba ki don katto katne ki daw kiba ka Sorkar kam lah ban leh eiei, hynrei kala khmih bha ia ka jinglong jingman haba wan kum kine ki jingeh khamtam ha ka kam rep kam riang.
Shuwa kane, u Myntri ka kam rep ula ong ba ka tnad ka la shimkhia ïa kane ka jingjia.
“Nga la tip ïa ka jinglong jingman bad nga la khot ïa ka jingïalang jong ka tnad rep. Ka dor ka la long biang kumba ju long mynta bad kaei kaba u dkhot ula ai jingmut ngi la buh jingthoh ban leh eiei,” ong u Myntri.
Haba u MLA ka Nongkrem u la kylli ba kum kiei ki jingshimkam lada don ka don ka jingkhñiot ïa ka dor u Myntri u la ong ba ki nongrep ki lah ban ujor lyngba ka CM-CONNECT khnang ban lah ban pynshitom.
Haba jubab ïa ki jingkylli ba kumno ka sorkar kan ïarap ïa ki nongrep ban kyntiew ïa ka ïoh ka kot ka kamai kajih jong ki, u Myntri u la ong ba ka sorkar ka la leh bun ki kam da kaba buh ïa ki producing unit ha Jaiñtia hills bad kumjuh ruh ha Ri Bhoi District bad ka jingbuh bun ki Cold Storage ha kaba kine ki la ïarap shibun bha ïa ki nongrep.