Sha ka ECI yn leit pynsngew ka VPP ban ïada ïa ki paidbah na ki jingshah thombor ha ka elekshon 2028

Jowai, Ïaïong, 15: Ki nongïalam jong ka Voice of the People Party (VPP) ha ka sngi Balang ki rai ban sa leit pynsngew sha ki tyndong skhor jong ka Election Commission of India (ECI) ban ai jingïada ïa ki paidbah nongshong shnong ka jylla ha ka elekshon 2028.
“Ngin sa leit pynsngew sha ki nongpynïaid jong ka Election Commission of India, khnang ban lait na ki jingjia shah thombor ha ki por elekshon khnang ba ki paidbah kin ïoh ban jied laidluid ïa ki nongmihkhmat,” ong u President ka VPP u Bah Ardent M. Basaiawmoit haba kren ha ka jingïalang paidbah kaba la long ha Jowai.
“Ka bor jong ka spah ngi la jop, sa ïa ka jingleh donbor ngin ïakhun,” la ong u Bah Ardent haba kren ha kane ka jingïalang paidbah ba la pynlong da ka VPP halor ka phang, “ka jingpynlaitluid ïa ki paidbah ka rilum Jaiñtia na ki jingshah thombor ha ka por election.’
U Bah Ardent ula ong ba ka party ka don ar tylli ka mat ban pynsngewthuh sha ki paidbah, kaba nyngkong ka seng ka la jop ha kaba hikai ïa ki paidbah ban ym shah thied ha ka bor jong ka pisa bad ïa kane la sakhi ha ka elekshon MLA bad elekshon MDC kiba ladep long.
Kaba ar mynta ka long ka jingleh donbor kaba la pyntieng pynsmiej ïa ki paidbah ha ka por elekshon. “Ïa kane ka VPP kan ïakhun ban pynlaidluid ïa ki paidbah khamtam hapoh ka rilum Jaiñtia,” la bynrap u Bah Ardent.
“Ngi la don jingkyrmen ban ïoh synshar hapoh ka JHADC ha ka election MDC ba ladep hynrei ngi la jop pat tang 8 tylli ki Constituency bad kane ka la buh ha ka jinglyngngoh ïa kiba bun balang bad ka party ka pdiang ïa kane ka khlem duh jingkyrmen,” la pynpaw u Bah Ardent.
“Lada ki paidbah ka Jaiñtia Hills kin ïohlad ban thep Vote kumba long ha KHADC, ka party ka la tikna ban jop ïa ka elekshon MDC ha JHADC,” u la ong bad ka jingïaroh ba ka VPP ka la ïoh ban sei ïa kawei ka longkmie ka Kong Deiwipaya Tongper kaba long kum ka ‘Latympang’ jong ka juk ba mynta.
U la ai ka jingïaroh ïa ki MDC jong ka VPP hapoh ka jingïalam jong u Bah Andrew Shullai kum u Nongïalam ka Liang Pyrshah ba ka Dorbar jong ka JHADC ka la ïoh ban ïatai shibun ki mat ba donkam.
Ha kaba ïadei bad ka jingkynnoh jong u MP ka Rajya Sabha na Meghalaya u Dr. WR Kharlukhi, u BahArdent u la pynphai nia da kaba ong, “kat ka rta jong u MP kam donkam shuh ban kren kum kito ki kyntien. Da pynshai ba ka Party kam pynksan ïa kaei kaba jia ha Narwan namar ka jingmih huri hura ka long tang na ka daw ka jingshah shet kylla bad ka party kam ju pynshlur ïa ki kam sniew.”
U la kynthoh ïa ka polisi pyntriem jong ka Sorkar kaba la sdang ban pynkynriah kam ïa ki nongtreikam Sorkar kiba la suba ba ki dei ki nongkyrshan ïa ka VPP bad ong ruh ba wat ïa ki nongtrei kam Muster Roll ki la ngat lang ha kajuh ka apot.
U Bah Ardent u la maham tyngeh ïa ki ophisar Sorkar kiba don bynta lang ha ka jingpynkynriah kam da kaba ong ka VPP kan ym map lada ka lap ïa ka jingshisha pyrshah ïa ki ophisar kiba shakri ïa ki lei san snem namar ka jingkylla kan sa wan.
U la kam bad kynnoh ruh ba wat ka rukom pynïoh ïing ïa ki baduk ba kyrduh lyngba ka skim Pradhan Mantri Awas Yojana PMAY jong ka Sorkar Kmie ka la don ka jingpyndonkam bakla.
U Bah Ardent ula ïathuh ba ïa ka VPP la pynkha ha ka 19 tarik, Naiwieng, 2021 bad ka don tang uwei u MLA hadien lai snem tam 2025 ka VPP ka la don saw ngut ki MLA, uwei u MP bad 25 ngut ki MDC, “balei ngi tieng ban mih shakhmat” namar ha kawei ka sngi ka VPP kan sa kurup ïa u lakam synshar hapoh ka Jylla.
“Lada u Blei u ibit ba ka VPP kan kurup ïa ka bor synshar, ha u snem 2028 ngin sar lut baroh 7 tylli ki Constituency hapoh ka rilum Jaiñtia. Kane ka long ka jingsdang ban ïakhun ïa ka kam thombor, khnang ba ki paidbah kin shngaiñ ka mynsiem hapoh ka ri la jong,” u la ong.
“To ngin ïaineh ha ka nongrim kaba skhem jong ka party , long katba long jia katba jia tad haduh ba ka VPP kan da ïoh ban bat ïa u lakam ha ka synshar khaddar bad ban ai jingkyrmen ïa ki longdien man dien jong ka jaitbynriew,” la pan jingkyrshan u Bah Ardent na ki paidbah.
Ha kane ka jingïalang la don lang ki MDC ka VPP na JHADC bad KHADC, u Vice President ka VPP Dr Kara H. Shen bad ki nongialam ka party.