Nongstoiñ, Nailar 03: Da ki spah ngut ki paidbah nongshong shnong, jong ka thaiñ Mawrok Porsohsat ha ka sngi nyngkong ki la mih paidbah, ban pynpaw ïa ka sur jong ka jingpynrem bad ka jingdawa na ki bor jong ka aiñ, ba dei ban set phatok shi jingim ïa u runar u Koldingstar Thongni, u ba la thombor bad shim ruh ïa ka jingim jong u Bah Elbin Kharbani ha ka miet shiteng synnïa jong ka 31 tarik.
Ka jingmih paidbah jong ki nongshong shnong kynthei bad shynrang ka la sdang naduh ka nohphai sngi, ha kaba la sdang ïa ka jingïaid paitbah nadudh Lai lad jong ka shnong Sohpian ter ter shaduh ka madan shnong Mawrok Porsohsat.
Ka sur kaba tylli na ki nongïaid paidbah ka long beit ka jingpynrem jur ïa u runar thrang snam, u Koldingstar Thongni u ba la pynïap ïa la u kthaw kurim da kaba pom da ka wait haduh ba un da mynsaw jur bad khlad noh.
Ki la don haduh 8 tylli ki shnong kiba la wan ban ïashimbynta ha katei ka rally, kiba la rah ruh ryngkat ki jingthoh pynrem ha ki placard ryngkat ka jingpyrta kaba jam ba dei ban pynshitom tyngeh ïa u runar u ba la nud ban shim ïa ka jingim briew.
Kine ki shnong ba marjan ki kynthup naduh ka shnong Pyndenglawar, Nongryntong, Syllei-Ïawkheiñ, Domkohsam, Nongsohpian, Nongspung, Photjaud, Mawrok Porsohsat bad kiwei kiwei.
Nalor kitei ki shnong la wan ban ïashimbynta lang ruh shibun ki riew rangbah jong ka thaiñ Nongstoiñ kiba kynthup naduh ki nongïalam shnong, ki seng longkmie, seng samla, seng rangbah ki la mih paidbah lang bad ban ai jingkren da ki kyntien ban pynrem jur ïa utei u runar thrang snam.
Ha katei ka jingïalang la ïadonlang u bah Pynroilang Nongsiej sordar shnong Mawrok Porsohsat, Lumlang Kharsyiemlieh President ka HYC WKHD, kong A Kharsyntiew Secretary ka Senglongkmie New Nongstoiñ, bah D.Sun President ka WKSU, bah Moslandar Marngar, bah Eric Kharsyntiew bad kiwei kiwei ki riew pawkhmat ka thaiñ Nongstoiñ bad ïa katei ka jingïalang la pynïaid da u bah Sirian Wahlang sordar shnong Nongsohpian.
Na ka liang ki nongïalam bapher bapher, da kawei ka sur ki la pyrta jam ha ki jingkren jong ki ba kum kine ki jingjia, kiba jia ha ka imlang sahlang dei ban pynduh pyndam shisyndon da ka jingtreilang ha baroh ki liang.
Ki nongkren ki la pynpaw ruh ba dei ban tohkit bniah bad ban pynngat ïa u runar ha ki kyndon aiñ kiba tyngeh katkum ki aiñ pynïap briew. Shuh shuh, ki la don ruh ki nongkren kiba la ong ba dei ban set phatok shi jingim ïa kum une u briew u ba pyntriem ïa ka imlang sahlang.
