Ki samla ki dei ban kiar na ki jingdih pynbuaid bad long ki nongshong shnong ba don jingkitkhlieh: DSP Crime

Shillong, Nailar 03: Kum shi bynta ka campaign Nasha Mukt Yuva for Viksit Bharat ha ka ri baroh kawei, ka MY Bharat, East Khasi Hills ka la pynlong ïa ki jingïakob Nasha Mukt ha ka kyrdan district ha St. Edmund’s College, ban pynshlur ïa ka jingïashim bynta jong ki samla ha ka jingïakhun pyrshah ïa ka jingdih drok.
Kane ka jingïalang ka la pynïasohlang ïa ki samla pule bad ki samla na kylleng ka district ban pynsaphriang jingtip pyrshah ïa ka jingdih drok lyngba ka jingpyni ïa ki sap bad ban pynskhem ïa ka khubor jong ka imlang sahlang kaba koit ba khiah bad kaba lait na u drok.
La pynlong phra tylli ki jingïakob kiba pynshong nongrim ha ka phang pdeng jong ka jingïada na ka jingdih drok, kaba la ailad ïa ki nongïashim bynta ban pyni ïa ka jingtbit jong ki lyngba ka jingsaiñdur, ka thoh ka tar bad kiwei kiwei ki kam. Ki jingïakob ki la sakhi ïa ka jingïashim bynta shitrhem na ki samla pule bad ki samla, kaba pyni ïa ka jingaiti jong ki sha ka kam ban tei ïa ka imlang sahlang kaba lait na u drok.
Haba ai jingkren ha ka jingïalang, u Bipul Das, DSP (Crime), East Khasi Hills, u la kyntu ïa ki samla ba kin kiar na ki jingdih pynbuaid bad ban long ki nongshong shnong kiba don ka jingkitkhlieh.
Da kaba ban jur ïa ka jingdonkam jong ka jingïatreilang, u la pynshlur ïa ki nongïashim bynta ban ïalam lynti ha ka jingai jingtip bad pynkhlaiñ ïa ki sienjam ha ka imlang sahlang ban ïaleh pyrshah ïa ka jingma jong u drok.
Ïa kane ka prokram la pynlong da u District Youth Officer, My Bharat Shillong, Tnad Youth Affairs jong ka sorkar pdeng, ryngkat ka jingkyrshan jong ka kynhun MY Bharat kaba la trei borbah, kaba pynthikna ïa ka jingpynlong kaba jop ïa ki jingïakob bad ki prokram ai jinghikai paidbah.
Ka bynta kaba kyrpang jong ka kane ka prokram ka long ka jingleit jngoh jong ki nongjop ha ki district sha Raj Bhavan, Shillong, ha kaba ki la ïoh lad ban ïakynduh ïa u Lat ka jylla Meghalaya.
Ha kane ka jingleit jngoh, ki nongïashim bynta ki la pyni ïa ka street play kaba pyni ïa ka jingïada na ka jingdih drok bad ka jingdonkam ban im ka jingim kaba koit ba khiah, kaba lait na ka jingkyrni. Kane ka street play ka la ïoh jingïaroh na baroh namar ka jingkyntiew ïa ki jingthmu jong ka campaign bad ai mynsiem ïa ka jingtreilang pyrshah ïa ki jingdih pynbuaid.
Ki nongjop ha ki jingïakob ha ka kyrdan district kin mihkhmat ïa ka East Khasi Hills ha ki jingïakob ha ka kyrdan jong ka jylla. Ki nongjop ha ka kyrdan jong ka jylla hadien kin sa ïakhun ha ki jingïakob ha ka kyrdan jong ka ri hapoh ka campaign Nasha Mukt Yuva for Viksit Bharat.
Ki riew shemphang kiba trei ha ka kam ban ïada na ka jingdih drok ki la ai ruh ïa ki jingtip shaphang ki jingma kiba lah ban mih na ka jingdih drok, ki lad jingïada bad ka jingdonkam ban shim ïa ki rai ha ka jingim da ka jingsngewthuh. Ki jingïalang ki la pyni ïa ka jingktah jong ka jingdih drok ïa ka imlang sahlang, ka met ka phad bad ka jingmut jingpyrkhat bad ki la pyni ïa ka jingdonkam jong ka jingsngewthuh na ka bynta ka jingïada.