Shillong, Risaw 15: Ka Meghalaya ka la mad ïa ka nam rem ha ka Mizoram da tang 12 ron ha kawei na ki jingïakhun kaba duna bha ka jingkamai point ha ka lympung Senior Women’s T20 Trophy plate group ha Agartala hynne ka sngi Balang.
Ka Mizoram ka la jop ïa ka jingkynting pisa bad ka jied ban tied nyngkong hynrei ka la shah pynkhyllem noh baroh ki nongtied tang na ka bynta 74 ron naki 19.5 ober. Ha kaba sdang beh ïa ka thong ki thei ïalehkai ka Meghalaya ki la lehbha hynrei ka la duh wiket iwei hadien iwei ban shah pynkut noh da tang 62 ron naki 19.1 ober.
Ka Riticia Nongbet ka la tyngshaiñ ha ka boling, da kaba khur 3/10 naki 3.5 ober, katba ka Solina Jaba ka la mad biang ïa kawei pat ka sngi kaba seisoh, da kaba wanphai ban khur 2/18 naki 4 ober. Ka Ajima Sangma (1/7 naki 3 ovber) bad ka Debasmita Dutta (1/8 naki 4) kidei kiwei pat ki thei ïalehkai kiba la ïoh ban khur wiket na ka bynta ka Meghalaya, katba ka PA Patel kadei kaba kongsan tam ha ka tied da kaba kamai 18 ron naki 24 bol na ka bynta ka Mizoram.
Ka Debasmita bad ka Luiza Tamang ki la sdang nyngkong ban tied na ka bynta ka Meghalaya bad ki la lah ban noh synñiang 22 ron na ka bynta ka wiket kaba nyngkong shuwa ba ka Luiza kan shah pynhap (out) noh na bynta 10 ron. Ka Debasmita kadei ka wiket kaba lai ka ban shah pynhap – kadei ka nongtied kaba kongsan tam ïa ka kynhun da kaba kamai 23 ron naki 38 bol (3x4s). Hadien kane ym shym la don kiwei ruh ki nongtied kiba la lah ban lehbha ban pynskhem ïa ka inning tied bad ka Meghalaya ka la hiar na ka 40/2 sha ka 62 ron haduh da khyllem baroh ki wiket(all out). Ka Sandhia kadei ka thei kawang bol ba seisoh tam jong ka Mizoram da kaba khur 3/9 naki 4 ober.
Ka Meghalaya ka la don lai tylli ki jingïalehkai kiba la shah pynsangeh namar ka jinglong jingman ka suiñbneng kaba sngem hynrei ym tang ka Meghalaya hynrei baroh ki kynhun ki la shah ktah na kadaw jong kane. Ka jingjop ha kane ka sngi kan jin da la pynthikna ïa ka Meghalaya na ka bynta ka final jong ka plate hynrei ha kaba khatduh ka la pyndep ha ka kyrdan ba saw ha ka group napdeng ki 6 kynhun.
