U-19 Vinoo Mankad Trophy: Ha ka ober ba khatduh khur ka Meghalaya ïa ka jingjop da 7 ron ïa ka Nagaland

Shillong, Risaw 15: Ka Meghalaya ka la lah ban khanglad ïa ka Nagaland ban khur ïa ka jingjop kaba ar ha ka jingïalehkai plate group jong ka U-19 men’s Vinoo Mankad Trophy, kaba la long hynne ka sngi Balang ha Chandigarh. Ka jingïakhun ban tip ïa ka nongjop ka la jam shaduh ka ober kaba khatduh eh hynrei ka Meghalaya ka la pynskhem ban jop da tang 7 ron.
Haba aiti ban tied nyngkong hadien ba ka Nagaland ka la jop ïa ka jingkynting pisa (toss), ka Meghalaya ka la lah ba kan kamai 155 ron bad hap lut ki wiket (all out) ha ki 48.3 ober bad hadien nangta ka Meghalaya ka la pynkhyllem noh ïa ka kynhun liang pyrshah jong ka na ka bynta 148 ron ha ki 49.1 ober ban pynthikna ïa ka jingjop kaba sah jingkynmaw.
Ka Nagaland ka la don ha ka jingeh kaba khraw hadien ba ka la shah pynduna sha ka 38/6, ha kaba u Apandanka Marak u la lah ban khur 4/18 na ki 10 over. Hynrei u kapten jong ka Nagaland, u Aloto Sumi u la ïalehkai bha ban kamai 66 ron naki 139 tylli ki bol bad ban noh synñiang 61 ron na ka bynta u wiket uba hynñiew ha ka jingïatreilang bad u Anurag Gupta (13 naki 54) ban pynskhem ïa ka kynhun.
Hynrei u Anurag ula shah pynkhyllem noh ha u Mewankitbok Kharpuri (1/33 na ki 10 ober) bad nangta u Benedict Jones Makdoh (2/16 na ki 10 ober) u la khur ar wiket ban weng noh ïa ki nongtied kiba kham tlot. Kane ka la pynlong ïa u Aloto ban ïakhun ïa ki ober ba khatduh bad u No. 11 u Ravi Kumar Ray. Ryngkat lang, ki la lah ban kamai sa 23 ron bad ki dang sah sa tang khyndiat ron ban poi sha ka jingjop haba u Aloto ula shah pynhap noh (run out) ha u Rudra Singh Rathor na ka bol ba nyngkong jong ka over ba khatduh, kaba la pynlong ïa ka Meghalaya ban khur ïa ka jingjop.
Shuwa kane, u Dipayan Nandi u la lam khmat ïa ka Meghalaya ha ka tied, da kaba khyrwit 52 ron na ki 91 tylli ki bol. U Angkit Tamang u la bynrap 38 ron na ka 107 tylli ki bol, ha kaba kine ki shijur ki la noh synñiang 93 ron na ka bynta u wiket uba saw hadien ba ka Meghalaya ka la shah pynduna sha ka 30/3. Ki Boundari (four & six) ki long kiba jwat ban ïoh, ha kaba u Dipayan bad u Angkit ki la ïoh ban thlieh tang kawei kawei,.
Da ka jingjop kaba ar sien lynter, ka Meghalaya kan ïakhun biang ïa ka Mizoram ha ka sngi Palei ha ka jingïalehkai ba khatduh jong ka round robin.